নিৰ্বাচন আয়োগে নিৰ্বাচনৰ সময়ত ৰেকৰ্ড কৰা ভিডিঅ’ আৰু ফটোগ্ৰাফৰ ষ্ট’ৰেজ সময়সীমা সন্দৰ্ভত বৃহৎ পৰিৱৰ্তন সাধন কৰিছে। এতিয়া এই তথ্যসমূহ কেৱল ৪৫ দিনৰ বাবেহে সুৰক্ষিত কৰি ৰখা হ’ব আৰু এই সময়ছোৱাত যদি কোনো নিৰ্বাচনী আবেদন দাখিল কৰা নহয় তেন্তে ইয়াক ধ্বংস কৰা হ’ব।
ইয়াৰ কাৰণ হিচাপে নিৰ্বাচন আয়োগে ছ’চিয়েল মিডিয়াৰ বিভ্ৰান্তিকৰ ব্যৱহাৰৰ কথা উল্লেখ কৰিছে।
আয়োগৰ তথ্য অনুসৰি বিভিন্ন সময়ত বিভিন্ন লোকে ভিডিঅ’ ক্লিপ বিকৃত কৰি ছ’চিয়েল মিডিয়াত ভুৱা তথ্য বিয়পোৱাৰ বহু ঘটনা পোহৰলৈ আহিছে, যাৰ বাবে এই সিদ্ধান্ত ল’বলগীয়া হৈছে।
এতিয়া নতুন গাইডলাইন পূৰ্বৰ নিৰ্দেশনাতকৈ সম্পূৰ্ণ পৃথক হ’ব। ২০২৪ চনৰ ৬ ছেপ্টেম্বৰত জাৰি কৰা পুৰণি গাইডলাইনত ভিডিঅ’বোৰ ৩ মাহৰ পৰা ১ বছৰলৈ সংৰক্ষণ কৰাৰ সময়সীমা আছিল। নিৰ্বাচনী প্ৰক্ৰিয়াৰ ভিডিঅ’ যেনে মনোনয়ন, প্ৰচাৰ, ভোটদান আৰু গণনাৰ ভিডিঅ’ বিভিন্ন সময়ৰ বাবে সংৰক্ষণৰ নিয়ম আছিল।
উল্লেখ্য যে, ২০২৪ চনৰ ডিচেম্বৰ মাহত নিৰ্বাচনী বিধি সংশোধন কৰি নিৰ্বাচনী ভিডিঅ’ জনসাধাৰণৰ বাবে উপলব্ধ কৰাত নিষেধাজ্ঞা আৰোপ কৰা হয়। নিৰ্বাচন আয়োগ আৰু আইন মন্ত্ৰালয়ৰ মাজত আলোচনাৰ অন্তত এই পৰিৱৰ্তন কৰা হৈছিল।
সেই সময়ত যুক্তি দিয়া হৈছিল যে চিচিটিভি ফুটেজ উপলব্ধ কৰিলে ভোটদানৰ গোপনীয়তা উলংঘা হ’ব পাৰে আৰু ইয়াক এআইৰ দৰে প্ৰযুক্তিয়ে অপব্যৱহাৰ কৰিব পাৰে।
