বিগত দুই-তিনি দিন ধৰি আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু তেওঁৰ প্ৰাক্তন সহযোগী এলন মাস্কৰ মাজত হোৱা মতানৈক্য আৰু অভিযোগ-প্ৰতিভিযোগ বিশ্ববাসীয়ে প্ৰত্যক্ষ কৰিলে। দুয়োজনে ইজনে সিজনৰ বিৰুদ্ধে এনে বহু অভিযোগ উত্থাপন কৰিছিল, যিয়ে সমগ্ৰ বিশ্বক আচৰিত কৰি তুলিছিল।
কিন্তু এতিয়া দুয়োৰে মাজত পুনৰ মিলনৰ লক্ষণ দেখা পোৱা গৈছে। দৰাচলতে টেছলা আৰু স্পেচএক্সৰ মালিক এলন মাস্কে ট্ৰাম্পৰ ওপৰত তেওঁৰ আটাইতকৈ বিপজ্জনক অভিযোগ (এপষ্টেইন ফাইলত ট্ৰাম্পৰ নাম) থকা পোষ্টটো ডিলিট কৰিছে।
মাস্কৰ এই টুইটটো ডিলিট কৰাটোৱে দুয়োৰে মাজত হোৱা বুজাবুজি হোৱাৰ ইংগিত প্ৰদান কৰিছে।
উল্লেখ্য যে ট্ৰাম্পৰ বিজয়ত মাস্কে ডাঙৰ ভূমিকা লৈছিল বুলি কোৱা হয়। নিৰ্বাচনত জয়ী হোৱাৰ পিছত ট্ৰাম্পে মাস্কক চৰকাৰী দক্ষতা বিভাগৰ (DOGE) মুৰব্বী হিচাপে নিযুক্তি দিয়ে। কিন্তু যোৱা মাহত মাস্কে এই পদৰ পৰা পদত্যাগ কৰিছিল।
ইয়াৰ পাছতে বিগত কিছুদিন ধৰি ছ’চিয়েল মিডিয়াত দুয়োৰে মাজত অভিযোগ আৰু প্রতি অভিযোগ উত্থাপন হৈছিল৷
উল্লেখ্য যে মাস্কে কৈছিল যে মোৰ বাবেই ট্ৰাম্পে নিৰ্বাচনত জয়ী হৈছে। আনহাতে, ট্ৰাম্পে মাস্ক আৰু তেওঁৰ কোম্পানীসমূহৰ ওপৰত বহু নিষেধাজ্ঞা আৰোপ কৰাৰ কথাও কৈছিল।
দুয়োজনৰ মাজত চলা বাকযুদ্ধৰ পিছতে এতিয়া মাস্কে পোষ্টটো ডিলিট কৰাটোৱে ইংগিত দিয়ে যে তেওঁ এতিয়া বেকফুটত। স্মৰ্তব্য যে ‘বিগ বিউটিফুল বিল’ (স্পেণ্ডিং বিল) আৰু কৰ কৰ্তন বিলক লৈ দুয়োৰে মাজত বিবাদ আৰম্ভ হৈছিল।
