যোৱা ১২ জুনত আহমেদাবাদত সংঘটিত হোৱা ভয়ংকৰ বিমান দুৰ্ঘটনা সন্দৰ্ভত শনিবাৰে প্ৰথমবাৰৰ বাবে অসামৰিক বিমান পৰিবহণ মন্ত্ৰালয়ে এক সংবাদমেল অনুষ্ঠিত কৰে। এয়াৰ ইণ্ডিয়াৰ বিমান এআই-১৭১ আহমেদাবাদ বিমানবন্দৰৰ পৰা উৰা মৰাৰ পিছতেই দুৰ্ঘটনাত পতিত হৈছিল।
অসামৰিক বিমান পৰিবহণৰ সচিব সমীৰ কুমাৰ সিনহাই কয় যে বিমানখন উৰণৰ পিছত মাত্ৰ ৬৫০ ফুট উচ্চতালৈ যাবলৈ সক্ষম হয়। ইয়াৰ কিছু সময়ৰ পিছতে বিমানখনৰ উচ্চতা হ্ৰাস পাবলৈ ধৰে আৰু পাইলটে দুপৰীয়া ১:৩৯ বজাত এটিচিলৈ ‘মে ডে’ ফোন প্ৰেৰণ কৰে। এক মিনিটৰ ভিতৰতে মেঘানীনগৰৰ মেডিকেল হোষ্টেল চৌহদত বিমানখন বাগৰি পৰে।
সমীৰ সিনহাই লগতে কয় যে দুৰ্ঘটনাৰ পূৰ্বে বিমানখনে কোনো কাৰিকৰী সমস্যা নোহোৱাকৈ পেৰিছ-দিল্লী-আহমেদাবাদ যাত্ৰা সম্পূৰ্ণ কৰিছিল।
অসামৰিক বিমান পৰিবহণ মন্ত্ৰী ৰাম মোহন নাইডুৱে এই দুৰ্ঘটনাক লৈ শোক প্ৰকাশ কৰি কয় যে তেওঁ পথ দুৰ্ঘটনাত পিতৃক হেৰুৱাইছে, গতিকে ভুক্তভোগী পৰিয়ালসমূহৰ যন্ত্ৰণা তেওঁ বুজিব পাৰে।
কেন্দ্ৰীয় চৰকাৰে এয়াৰ ইণ্ডিয়া দুৰ্ঘটনাৰ তদন্তৰ বাবে এখন উচ্চ পৰ্যায়ৰ কমিটী গঠন কৰিছে, যিয়ে তিনি মাহৰ ভিতৰত প্ৰতিবেদন দাখিল কৰিব। গৃহ সচিবৰ নেতৃত্বত গঠিত এই কমিটীত কেন্দ্ৰ আৰু ৰাজ্য চৰকাৰৰ যুটীয়া সচিব পৰ্যায়ৰ ওপৰৰ বিষয়াসকল অন্তৰ্ভুক্ত হ’ব।
কমিটীয়ে দুৰ্ঘটনাটোৰ কাৰণসমূহৰ তদন্ত কৰি বৰ্তমানৰ এছ অ’ পি আৰু গাইডলাইনসমূহ পৰ্যালোচনা কৰিব, আৰু ভৱিষ্যতে এনেধৰণৰ ঘটনাৰ মোকাবিলা কৰিবলৈ বিস্তৃত পৰামৰ্শ আগবঢ়াব।
ডিজিচিএৰ নিৰ্দেশ অনুসৰি এয়াৰ ইণ্ডিয়াৰ বয়িং ৭৮৭ ড্ৰিমলাইনাৰ বিমানৰ তদন্ত চলি আছে। ভাৰতত মুঠ ৩৪ খন ড্ৰিমলাইনাৰ আছে, ইয়াৰে ৮ খনৰ তদন্ত সম্পূৰ্ণ হৈছে।
উল্লেখ্য যে, দুৰ্ঘটনাগ্ৰস্ত বিমানখনত ২৪২ জন লোক আছিল, ইয়াৰে ২৪১ জন লোকৰ মৃত্যু হয় আৰু মাত্ৰ এজন লোকৰহে সৌভাগ্যক্ৰমে প্ৰাণ ৰক্ষা পৰে। বিমানখন দুৰ্ঘটনাগ্ৰস্ত হোৱা মেডিকেল হোষ্টেল কমপ্লেক্সতো ২০ জনতকৈ অধিক লোকে প্ৰাণ হেৰুৱাইছে।
