আফগানিস্তানৰ ৰাজধানী কাবুলৰ শৰণাৰ্থী মন্ত্ৰালয়ত বুধবাৰে এক বৃহৎ বিস্ফোৰণ সংঘটিত হয়। তালিবানৰ শৰণাৰ্থী মন্ত্ৰালয়ৰ চৌহদত সংঘটিত হোৱা বিস্ফোৰণত তালিবানৰ শৰণাৰ্থী মন্ত্ৰী খলিল ৰহমান হাক্কানী আৰু তেওঁৰ তিনিজন দেহৰক্ষীকে ধৰি মুঠ ১২ জন লোক নিহত হৈছে।
জানিব পৰা মতে, মন্ত্ৰী খলিল ৰহমান হাক্কানীয়ে খোষ্টৰ পৰা অহা এদল লোকক সাক্ষাত কৰি থকাৰ সময়তে এই বিস্ফোৰণ সংঘটিত হয়। তালিবান চৰকাৰেও এই বিস্ফোৰণৰ ঘটনা নিশ্চিত কৰিছে।
কাবুলৰ শৰণাৰ্থী পৰিক্ৰমা মন্ত্ৰী খলিল ৰহমান হাক্কানীৰ মৃত্যু তালিবানৰ বাবে এক মোক্ষম আঘাত। তালিবান সংগঠনৰ শীৰ্ষ নেতৃত্বৰ এক গুৰুত্বপূৰ্ণ অংশ আছিল মন্ত্ৰী খলিল ৰহমান হাক্কানী।
শৰণাৰ্থী মন্ত্ৰালয়ত হোৱা বিস্ফোৰণৰ পিছত মন্ত্ৰালয় চৌহদত এক অবৰ্ণীয় পৰিৱেশৰ সৃষ্টি হয়। এই বৃহৎ বিস্ফোৰণত আক্ৰমণকাৰীৰো মৃত্যু হোৱা বুলি জানিব পৰা গৈছে।
লাভ কৰা খবৰ অনুসৰি, বিস্ফোৰণৰ ফলত বহু লোক গুৰুতৰভাৱে আহত হৈছে। শৰণাৰ্থী মন্ত্ৰালয়ৰ চৌহদত কেনেকৈ এই বিস্ফোৰণ ঘটিল আৰু কোনে এই ঘটনা সংঘটিত কৰিলে সেই কথা এইপৰ্যন্ত নিশ্চিত কৰিব পৰা নাই। এতিয়ালৈকে কোনো সংগঠনে এই বিস্ফোৰণৰ দায়িত্ব স্বীকাৰ কৰা নাই।
