ডিব্ৰুগড় জিলাৰ মৰাণৰ ৰাজপথত দেখা যাব সুখই, ৰাফেল, মিগ, তেজস, হাৰকিউলিছ, AN-32 আদিৰ দৰে যুঁজাৰু জেট বিমান। উজনি অসমৰ ডিব্ৰুগড় জিলাৰ মৰাণৰ ২ নং ৰাষ্ট্ৰীয় ঘাইপথত অৱতৰণ আৰু উৰাব পাৰিব যিকোনো যুঁজাৰু বিমান আৰু হেলিকপ্তাৰ।
অসমৰ মুখ্যমন্ত্ৰী ড০ হিমন্ত বিশ্ব শৰ্মাই আজি দিনৰ ২.৩০ বজাত মৰাণ জাতিয়নী গাঁৱত উপস্থিত হৈ নিৰ্মাণ হৈ থকা জৰুৰীকালীন বিমান অৱতৰণ আৰু উৰণৰ সুবিধাযুক্ত ২ নং ৰাষ্ট্ৰীয় ঘাইপথটো পৰিদৰ্শন কৰে।
পৰিদৰ্শনৰ পিছত মুখ্যমন্ত্ৰী শৰ্মাই চলিত বছৰৰ অক্টোবৰৰ পৰা সম্পূৰ্ণৰূপে এই পথচোৱাত জৰুৰীকালীন অৱস্থাত যিকোনো বিমান উৰণ বা অবতৰণ কৰিব পৰা যাব বুলি উল্লেখ কৰে।
উল্লেখ্য যে, নিৰ্মীয়মান ৪ লেন যুক্ত ২ নং ৰাষ্ট্ৰীয় ঘাইপথত মৰাণ পলক্লাবৰ পৰা ৰছীপথাৰলৈকে অধিক উন্নতমানৰ জৰুৰীকালীন ৰান ৱে’ সুবিধাৰে পৰিপুষ্ট পথচোৱা নিৰ্মাণ কৰি থকা হৈছে। এই পথচোৱাৰ মুঠ দৈৰ্ঘ্য ৪.২ কিলোমিটাৰ।
যুদ্ধকালীন পৰিস্থিতি অথবা প্ৰাকৃতিক দুৰ্যোগৰ সময়ত এই ৰাজপথটো ভাৰতীয় বায়ুসেনাই ৰান ৱে’ হিচাপে ব্যৱহাৰ কৰিব পাৰিব।
ৰাষ্ট্ৰীয় ঘাইপথ প্ৰাধিকৰণৰ লগতে ভাৰতীয় বায়ু সেনাৰ বিমান বন্দৰ নিৰ্মাণ বিভাগৰ যৌথ উদ্যোগত নিৰ্মাণ কৰি থখা হৈছে পথটো। জৰুৰীকালীন সময়ত বিমান অৱতৰণ আৰু উৰণৰ সময়ত মানুহ, জীৱ-জন্তু সোমাব নোৱাৰাকৈ পথৰ কাষত ফেঞ্চিং দিয়া হৈছে। লগতে নিৰ্মাণ কৰা হৈছে এটা এয়াৰ ট্ৰেফিক কন্ট্ৰ’ল টাৱাৰ (ATC)।
অবশ্যে জৰুৰীকালীন পৰিস্থিতিতহে এই পথটো বিমান উৰণ আৰু অৱতৰণৰ বাবে ব্যৱহাৰ হ’ব।
