নেপালত চলি থকা অস্থিৰতাৰ মাজতেই আহিছে এক ডাঙৰ খবৰ। প্ৰায় চাৰি ঘণ্টা ধৰি চলা ভাৰ্চুৱেল বৈঠকত প্ৰতিবাদকাৰীসকলে প্ৰাক্তন মুখ্য ন্যায়াধীশ সুশীলা কাৰ্কীক অন্তৱৰ্তীকালীন প্ৰধানমন্ত্ৰী হিচাপে মনোনীত কৰিছে।
কাৰ্কীৰ নিৰপেক্ষ ভাবমূৰ্তি আৰু ৰাজনৈতিক দলৰ পৰা দূৰত্ব বজাই ৰখাৰ বাবেই প্ৰতিবাদকাৰীসকলে তেওঁক নিৰ্বাচিত কৰিছে। কোনো ৰাজনৈতিক দলৰ সৈতে জড়িত কোনো ব্যক্তিক তেওঁলোকৰ নেতা হিচাপে বাছি লোৱা নহ’ব বুলি জেনেৰেচন জেডৰ সদস্যসকলে কয়।
উল্লেখ্য যে, নেপালৰ প্ৰথমগৰাকী মহিলা মুখ্য ন্যায়াধীশ আছিল সুশীলা কাৰ্কী। ১৯৫২ চনৰ ৭ জুনত বিৰাটনগৰত জন্মগ্ৰহণ কৰা সুশীলাই নেপালৰ ত্ৰিভুৱন বিশ্ববিদ্যালয়ৰ পৰা আইনৰ ডিগ্ৰী গ্ৰহণ কৰিছিল। ইয়াৰ পূৰ্বে তেওঁ ভাৰতৰ বেনাৰস হিন্দু বিশ্ববিদ্যালয়ৰ পৰা স্নাতকোত্তৰ ডিগ্ৰী লৈছিল।
১৯৭৯ চনত ওকালতি আৰম্ভ কৰাৰ পিছত ২০০৭ চনত কাৰ্কীক জ্যেষ্ঠ অধিবক্তা হিচাপে নিযুক্তি দিয়া হয়। ২০০৯ চনত নেপালৰ উচ্চতম ন্যায়ালয়ৰ অধিবক্তা ন্যায়াধীশ হোৱাৰ পিছত ২০১০ চনত তেওঁক স্থায়ীভাৱে নিযুক্ত দিয়া হয়।
ইয়াৰ পিছত ২০১৬ চনৰ ১১ জুলাইৰ পৰা ২০১৭ চনৰ ৬ জুনলৈকে নেপালৰ মুখ্য ন্যায়াধীশৰ দায়িত্ব গ্ৰহণ কৰে। এই সময়ছোৱাত তেওঁ দুৰ্নীতিৰ বহু বিষয়ত কঠোৰ ব্যৱস্থা গ্ৰহণ কৰাও পৰিলক্ষিত হয়।
