ঘোষণা কৰা হ’ল গুৱাহাটী বিশ্ববিদ্যালয় স্নাতকোত্তৰ ছাত্ৰ সন্থাৰ নিৰ্বাচনৰ ফলাফল। অসম গণ পৰিষদৰ ছাত্ৰ সংগঠন ছাত্ৰ পৰিষদৰ সমৰ্থিত প্ৰাৰ্থী কৌশিক বৰুৱা সাধাৰণ সম্পাদক পদত জয়ী হৈছে। বিশ্ববিদ্যালয়খনৰ গোপীনাথ বৰদলৈ ২ নং তিনিমহলীয়া ছাত্ৰাবাসৰ আৱাসী কৌশিক বৰুৱাৰ ঘৰ লখিমপুৰ জিলাৰ ঢকুৱাখানাত।
ইফালে, অখিল ভাৰতীয় বিদ্যাৰ্থী পৰিষদৰ সমৰ্থিত প্ৰাৰ্থী মানস প্ৰতিম কলিতাই সভাপতি পদত জয়ী হয়। গুৱাহাটী বিশ্ববিদ্যালয় গণসংযোগ আৰু সাংবাদিকতা বিভাগৰ ছাত্ৰ মানস কলিতাৰ ঘৰ ৰঙিয়াত।
আনহাতে উপ-সভাপতি, সহকাৰী সাধাৰণ সম্পাদককে ধৰি ৬টা পদত জয় লাভ কৰিছে সদৌ অসম ছাত্ৰ সন্থা সমৰ্থিত প্ৰাৰ্থীয়ে। উপ-সভাপতি পদত জয়ী হৈছে উদীপ্ত বায়ন। সহকাৰী সাধাৰণ সম্পাদক পদত জয়ী হৈছে নিমিশা শইকীয়া। সাহিত্য সম্পাদকত জয়ী হৈছে প্ৰাণজিৎ কোচ। সাংস্কৃতিক সম্পাদক পদত জয়ী হৈছে বন্দিতা ডেকা।
ইফালে ক্ৰীড়া সম্পাদক ৰৌশন কুমাৰ চাহু, সংগীত বিভাগৰ সম্পাদক পদত নিবেদিতা কলিতা, গুৰুত খেল বিভাগৰ সম্পাদক পদত দীপজ্যোতি শৰ্মা, লঘু ক্ৰীড়া বিভাগৰ সম্পাদক পদত উজ্জ্বল কলিতা, শৰীৰচৰ্চা বিভাগৰ সম্পাদক পদত প্ৰিয়াংক বৰ্মন, সমাজ সেৱা বিভাগৰ সম্পাদক পদত দীপজ্যোতি চহৰীয়া আৰু তৰ্ক বিভাগৰ সম্পাদক পদত মিণ্টু ডেকাই জয় লাভ কৰে।
উল্লেখ্য যে, এইবাৰৰ নিৰ্বাচনত সদৌ অসম ছাত্ৰ সন্থা চমুকৈ আছুৱে মুখ্য পদবী সমূহত জয় লাভ নকৰাত তীব্ৰ সমালোচনাৰ সন্মুখীন হৈছে। ইফালে ছাত্ৰ মুক্তি সংগ্ৰাম পৰিষদ আৰু এন এছ ইউ আইৰ দৰে সংগঠন সমূহেও বেয়াকৈ মুখথেকেচা খোৱা পৰিলক্ষিত হৈছে।
