গাজাত অব্যাহত আছে ইজৰাইলৰ আক্ৰমণ। যাৰ বাবে গাজা ষ্ট্ৰিপৰ পৰিস্থিতি দিনক দিনে অচল হৈ গৈ আছে। দুমাহ পূৰ্বে ইজৰাইলে খাদ্য যোগান বন্ধ কৰাৰ পিছতেই এতিয়া মুকলিকৈ দেখা গৈছে ভোকাতুৰ গাজাবাসীৰ অৱস্থা।
বুধবাৰে কমিউনিটি পাকঘৰ, ব্যৱসায়ীৰ দোকান আৰু ৰাষ্ট্ৰসংঘৰ সাহায্য সংস্থা ইউএনআৰডব্লিউএৰ মুখ্য কাৰ্যালয়কে ধৰি কমেও পাঁচটা স্থানত লুটপাত হয়।
পেলেষ্টাইনী এন জি অ’ নেটৱৰ্কৰ সঞ্চালক আমজাদ আল-শ্বাৱাই কয় যে, এই ঘটনাবোৰে দেখুৱাইছে যে গাজাৰ পৰিস্থিতি কিমান ভয়াৱহ হৈ পৰিছে।ইউ এন আৰ ডব্লিউ এৰ জ্যেষ্ঠ বিষয়া লুইজ ৱাটাৰিজৰ মতে বুধবাৰে নিশা গাজা চহৰত থকা সংস্থাটোৰ চৌহদত হাজাৰ হাজাৰ স্থানচ্যুত লোকে ভাঙি ঔষধ লুটপাত কৰাৰ লগতে কেইবাখনো বাহনৰ ক্ষতিসাধন কৰে।
হামাছৰ গাজাস্থিত সংবাদ মাধ্যমৰ কাৰ্যালয়ৰ সঞ্চালক ইছমাইল আল-থাৱাবাটাই কয় যে, এই কাণ্ডসমূহ কেইজনমান ব্যক্তিৰহে কাৰ্য্য। ই পেলেষ্টাইনী সমাজৰ মূল্যবোধক প্ৰতিফলিত নকৰে। তেওঁ দাবী কৰে যে, স্থানীয় প্ৰশাসনে এই গোচৰসমূহৰ তদন্ত কৰি আছে আৰু শান্তি বজাই ৰখাৰ বাবে প্ৰচেষ্টা অব্যাহত ৰাখিছে।
১ মে’ৰ বিমান আক্ৰমণত কমেও ১২ জন লোক নিহত হয়। চলিত বৰ্ষৰ জানুৱাৰী মাহত অস্থায়ী যুদ্ধবিৰতিৰ পিছত হামাছে আৰক্ষী নিয়োগ কৰিছিল যদিও মাৰ্চ মাহত ইজৰাইলে পুনৰ পূৰ্ণাংগ আক্ৰমণ আৰম্ভ কৰাৰ পিছত তেওঁলোকৰ উপস্থিতি দুৰ্বল হৈ পৰে।
