বিগত ১৮ মাহ ধৰি গাজাত হামাছৰ সৈতে যুদ্ধ কৰি থকা ইজৰাইল এতিয়া এক বৃহৎ সমস্যাৰ সন্মুখীন হৈছে। কিছুদিন পূৰ্বে ইজৰাইলৰ জেৰুজালেমৰ সমীপৰ অৰণ্যত সংঘটিত হোৱা অগ্নিকাণ্ড দ্ৰুতগতিত বৃদ্ধি পাইছে। যাৰ বাবে ইজৰাইলৰ চাৰিওফালৰ অঞ্চলত আতংকৰ পৰিৱেশে বিৰাজ কৰিছে।
অগ্নিকাণ্ডৰ ভয়াবহ ৰূপৰ প্ৰতি লক্ষ্য ৰাখি দেশত জাৰি কৰা হৈছে ৰাষ্ট্ৰীয় জৰুৰীকালীন অৱস্থা। ইফালে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে সকীয়াই দিছে যে, অতি সোনকালে জেৰুজালেম চহৰৰ ভিতৰুৱা অংশতো এই জুইৰ শিখাই প্ৰৱেশ কৰিব পাৰে।
খবৰ অনুসৰি এই পৰ্যন্ত হাজাৰ হাজাৰ লোকক নিৰাপদ স্থানলৈ স্থানান্তৰ কৰা হৈছে। একে সময়তে জুই আৰু ক’লা ধোঁৱাৰ বাবে কাষৰীয়া অঞ্চলৰ মানুহৰ শ্বাসৰুদ্ধ হৈ পৰিছে। লগতে বহু লোক আহত হোৱাৰ খবৰ পোৱা গৈছে।
স্থানীয় সংবাদ মাধ্যমে প্ৰকাশ কৰা অনুসৰি, ইজৰাইলত বহু বছৰৰ পিছত দেখা আটাইতকৈ ভয়াৱহ জুই নিৰ্বাপনৰ বাবে অগ্নিনিৰ্বাপক বাহিনীয়ে নিৰন্তৰে যুঁজিছে। জুই নিয়ন্ত্ৰণৰ বাবে সেনাবাহিনীকো মোতায়েন কৰা হৈছে।
ইয়াৰ পূৰ্বে ইজৰাইল আৰক্ষীয়ে জেৰুজালেম আৰু টেল আভিভ সংযোগী পথটো বন্ধ কৰি দিছিল। ঘাইপথৰ কাষত বসবাস কৰা লোকসকলক আগতীয়াকৈ সেই অঞ্চল খালী কৰিবলৈ নিৰ্দেশ দিয়া হৈছিল।
পৰিস্থিতি অধিক ভয়াৱহ হোৱাৰ লগে লগে বৃহস্পতিবাৰে কেইবাখনো দেশে ইজৰাইললৈ অগ্নিনিৰ্বাপক বিমান প্ৰেৰণ কৰে। তথ্য অনুসৰি, যোৱা ৩০ এপ্ৰিলত দুপৰীয়াৰ আশে-পাশে সংঘটিত হোৱা অগ্নিকাণ্ড নিয়ন্ত্ৰণ কৰাটো কঠিন হৈ পৰিছে।
ইটালী, ক্ৰ’ৱেচিয়া, স্পেইন, ফ্ৰান্স আৰু ৰোমানিয়াই ইজৰাইললৈ সাহায্য প্ৰেৰণ কৰি গৰম, শুকান পৰিস্থিতি আৰু প্ৰচণ্ড বতাহৰ ফলত ইন্ধন যোগোৱা জুই নিয়ন্ত্ৰণ কৰাত সহায় কৰিছে। উত্তৰ মেচিডোনিয়া, চাইপ্ৰাছকে ধৰি আন বহু দেশেও নিজৰ বিমান প্ৰেৰণ কৰিছে। ইজৰাইলৰ বিষয়াসকলে জনাইছে যে ১০খনতকৈও অধিক অগ্নিনিৰ্বাপক বিমানে জুই নিৰ্বাপনৰ চেষ্টা চলাইছে।
ইফালে ইজৰাইলৰ প্ৰধানমন্ত্ৰী বেঞ্জামিন নেতান্যায়াহুৱে বনজুইৰ সন্দৰ্ভত সতৰ্কবাণী জাৰি কৰিছে। নেতানিয়াহুৱে এক বিবৃতি প্ৰকাশ কৰি কয় যে,এইয়া এক ৰাষ্ট্ৰীয় জৰুৰীকালীন অৱস্থা। বৰ্তমান ইজৰাইলৰ অগ্ৰাধিকাৰ হৈছে জেৰুজালেমক সুৰক্ষা দিয়া।
