শুকুৰবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে পশ্চিম এছিয়া ভ্ৰমণৰ সামৰণিৰ পিছতেই গাজাত ইজৰাইলৰ আক্ৰমণত ১০৮ জন লোক নিহত হোৱাৰ লগতে আহত হয় বহুলোক। গাজাৰ স্বাস্থ্য মন্ত্ৰালয়ে প্ৰকাশ কৰা অনুসৰি, শুকুৰবাৰে বিমান আক্ৰমণত ২৭ গৰাকী মহিলা আৰু ৩১ গৰাকী শিশু নিহত হোৱাৰ লগতে আহত হয় শতাধিক লোক।
শুকুৰবাৰে ইজৰাইলে য়েমেনৰ দুটা বন্দৰত আক্ৰমণ কৰে, যিবোৰ বন্দৰ হাউথী বিদ্ৰোহী সংগঠনে অস্ত্ৰ পৰিবহণৰ বাবে ব্যৱহাৰ কৰি আছে বুলি জনায়। ১৫ মে’ৰ নিশাৰ পৰা ১৬ মে’ৰ পুৱালৈকে ডেইৰ আল বালাহৰ বাহিৰৰ অঞ্চল আৰু খান ইউনিছ চহৰত সংঘটিত হয় এই আক্ৰমণ। গাজাৰ স্বাস্থ্য মন্ত্ৰালয়ে জনোৱা মতে, শতাধিক লোক আহত হয়।
১৬ মে’ত ইজৰাইলে গাজাত উগ্ৰপন্থীৰ বিৰুদ্ধে অভিযান অব্যাহত ৰাখিছে আৰু বিগত দিনটোত ১৫০ টা লক্ষ্যত আক্ৰমণ চলাইছে বুলি জানিবলৈ দিয়ে। গাজাৰ স্বাস্থ্য মন্ত্ৰালয়ে জনোৱা মতে, ১৬ মে’ৰ পুৱালৈকে এই আক্ৰমণ অব্যাহত থকাৰ বাবে জাবালিয়া শৰণাৰ্থী শিবিৰ আৰু বেইট লাহিয়া চহৰৰ পৰা পলায়ন কৰিবলগীয়া হয়।
স্বাস্থ্য মন্ত্ৰালয়ৰ তথ্য অনুসৰি, পূৰ্বৰ আক্ৰমণত ১৩০ জনতকৈ অধিক লোক নিহত হৈছিল। য়েমেনত সংঘটিত আক্ৰমণৰ পিছত কোনো লোকৰ মৃত্যু হোৱাৰ খবৰ তাৎক্ষণিকভাৱে পোৱা হোৱা নাই। হুথী চেটেলাইট চেনেল আল-মছিৰাহে এই আক্ৰমণৰ কথা স্বীকাৰ কৰে যদিও আন কোনো সবিশেষ প্ৰকাশ কৰা নাই। ইজৰাইলৰ সেনাই কয় যে, ট্ৰাম্পৰ ভ্ৰমণৰ সময়ত য়েমেনৰ পৰা ইজৰাইলৰ আকাশমাৰ্গ অভিমুখে নিক্ষেপ কৰা কেইবাটাও ক্ষেপণাস্ত্ৰ বাধাগ্ৰস্ত কৰিছিল।
ইতিমধ্যে ইজৰাইলৰ প্ৰধানমন্ত্ৰী বেঞ্জামিন নেতান্যায়াহুৱে হামাছক নিৰ্মূল কৰাৰ লক্ষ্যত উপনীত হ’বলৈ গাজাত আক্ৰমণ তীব্ৰতৰ কৰিব বুলি উল্লেখ কৰিছে। মঙলবাৰে জাৰি কৰা এক বিবৃতিত, নেতান্যায়াহুৱে কয় যে তেওঁৰ ইজৰাইলী বাহিনীয়ে কেইদিনমানৰ ভিতৰতে পূৰ্ণ শক্তিৰে গাজাত প্ৰৱেশ কৰি মিছন সম্পূৰ্ণ কৰিব, অৰ্থাৎ হামাছ ধ্বংস কৰিব।
উল্লেখ্য যে, ইজৰাইল আৰু গাজাৰ মাজত এই যুদ্ধ আৰম্ভ হৈছিল ২০২৩ চনৰ ৭ অক্টোবৰৰ পৰা, যেতিয়া হামাছৰ নেতৃত্বত সন্ত্ৰাসবাদীয়ে দক্ষিণ ইজৰাইলত অনুপ্ৰৱেশ কৰি ১২০০ জন লোকক হত্যা কৰিছিল। ইয়াৰ প্ৰতিক্ৰিয়া স্বৰূপে ইজৰাইলে ব্যাপক সামৰিক অভিযান আৰম্ভ কৰে য’ত গাজাৰ স্বাস্থ্য মন্ত্ৰালয়ৰ মতে এতিয়ালৈকে ৫৩ হাজাৰতকৈ অধিক পেলেষ্টাইনী নিহত হৈছে। ইয়াৰ ভিতৰত আছে বৃহৎ সংখ্যক মহিলা আৰু শিশু।
ইয়াৰে ১৮ মাৰ্চত যুদ্ধবিৰতি ভংগ হোৱাৰ পিছত প্ৰায় ৩ হাজাৰ লোকৰ মৃত্যু হৈছে।৭ অক্টোবৰত ইজৰাইলৰ ওপৰত আক্ৰমণৰ সময়ত লোৱা প্ৰায় ২৫০ জন লোকৰ ভিতৰত হামাছে এতিয়াও ৫৮ জনক পণবন্দী কৰি ৰাখিছে। ইয়াৰে ২৩ জন এতিয়াও জীয়াই থকা বুলি অনুমান কৰা হৈছে।
