২৯ মে’ত হোৱাইট হাউছে নিশ্চিত কৰে যে ইজৰাইলে গাজাত ৬০ দিনীয়া যুদ্ধবিৰতিৰ প্ৰস্তাৱত অনুমোদন জনাইছে। অৱশ্যে ইজৰাইলী সেনাৰ সামৰিক অভিযান বৰ্তমানেও অব্যাহত আছে গাজাত।
হোৱাইট হাউছৰ প্ৰেছ সচিব কেৰ’লিন লেভিটে এক সংবাদমেলত কয় যে, আমেৰিকাৰ বিশেষ মধ্যপ্ৰাচ্যৰ দূত ষ্টিভ উইটকফ আৰু ৰাষ্ট্ৰপতি ড’নাল্ড ট্ৰাম্পে এই প্ৰস্তাৱ হামাছলৈ প্ৰেৰণ কৰিছে, যিটো ইজৰাইলে ইতিমধ্যে সমৰ্থন কৰিছে।
খবৰ অনুসৰি, ইজৰাইলে ইতিমধ্যে এই প্ৰস্তাৱত সন্মতি দিছে, তাৰ পিছতহে এই প্ৰস্তাৱ হামাছলৈ প্ৰেৰণ কৰা হৈছিল। কেৰ’লিন লেভিটে কয় যে, তেওঁলোকে আশা কৰিছে যে গাজাত অতি সোনকালে যুদ্ধবিৰতি হ’ব যাতে সকলো পণবন্দীক নিৰাপদে ঘূৰাই আনিব পৰা যায়। তেওঁ লগতে কয় যে, এই প্ৰক্ৰিয়া বৰ্তমানেও চলি আছে, গতিকে ইয়াৰ সৈতে জড়িত অধিক তথ্য প্ৰকাশ কৰা নহ’ব।
এক প্ৰতিবেদন অনুসৰি, সংবাদ সংস্থাই প্ৰকাশ কৰা অনুসৰি এই প্ৰস্তাৱত ৬০ দিনৰ যুদ্ধবিৰতিৰ লগতে ১০ জন জীৱন্ত পণবন্দীক মুকলি কৰি দিয়াৰ লগতে ১৮ জন মৃত পণবন্দীৰ অৱশিষ্ট ঘূৰাই অনাৰ কথাও অন্তৰ্ভুক্ত কৰা হৈছে।
আনহাতে, হামাছে নিশ্চিত কৰিছে যে তেওঁলোকে এই নতুন যুদ্ধবিৰতিৰ প্ৰস্তাৱ মধ্যস্থতাকাৰীৰ জৰিয়তে লাভ কৰিছে আৰু ইয়াৰ জ্যেষ্ঠ নেতাসকলে ইয়াক বিবেচনা কৰি আছে।
হামাছে এক বিবৃতিত কয় যে, হামাছৰ নেতাসকলে মধ্যস্থতাকাৰীৰ জৰিয়তে ষ্টিভ উইটকফৰ নতুন প্ৰস্তাৱ গ্ৰহণ কৰিছে আৰু গাজা ষ্ট্ৰিপত সকাহ প্ৰদান আৰু স্থায়ী যুদ্ধবিৰতি নিশ্চিত কৰাৰ লক্ষ্যৰে তেওঁলোকৰ জনসাধাৰণৰ স্বাৰ্থত ইয়াৰ ওপৰত গুৰুত্বসহকাৰে অধ্যয়ন কৰি আছে।
