গাজা যুদ্ধৰ এবছৰতকৈও অধিক সময় পাৰ হৈ গৈছে, যদিও হতাহতৰ সংখ্যা বৃদ্ধি পাইছে। ডোহাত চলি থকা যুদ্ধবিৰতিৰ আলোচনাৰ মাজতে নৱবৰ্ষৰ মাত্ৰ ৫ দিনৰ ভিতৰতে ইজৰাইলৰ আক্ৰমণত ২০০ৰো অধিক পেলেষ্টাইনী লোকে প্ৰাণ হেৰুৱাইছে।
গাজাৰ স্বাস্থ্য মন্ত্ৰালয়ে ৭ অক্টোবৰৰ পৰা প্ৰাণ হেৰুওৱা পেলেষ্টাইনীসকলৰ তথ্য প্ৰকাশ কৰিছে। তথ্য অনুসৰি, সমগ্ৰ যুদ্ধৰ সময়ছোৱাত ইজৰাইলৰ আক্ৰমণত এতিয়ালৈকে ৪৫,৮০০ পেলেষ্টাইনী লোকৰ প্ৰাণহানি হৈছে আৰু ১০৯,০০০ লোক আহত হৈছে।
মন্ত্ৰালয়ৰ বিবৃতিত কোৱা হৈছে যে, ২০২৩ চনৰ অক্টোবৰৰ পৰা গাজাত ইজৰাইলী সৈন্যৰ আক্ৰমণৰ বলি হোৱা লোকৰ সংখ্যা ৪৫,৮০৫ জন হৈছেগৈ, য’ত ১০৯,০৬৪ জন আহত হৈছে। সংস্থাটোৱে লগতে জোৰ দি কয় যে, বিগত ২৪ ঘন্টাত যুদ্ধবিধ্বস্ত অঞ্চলটোত ইজৰাইলে আক্ৰমণত ৮৮ জন পেলেষ্টাইনী নিহত আৰু ২০৮ জন আহত হৈছে।
২০২৩ চনৰ ৭ অক্টোবৰত পেলেষ্টাইনী গোট হামাছৰ যোদ্ধাসকলে ইজৰাইলৰ ভূখণ্ডত হঠাৎ আক্ৰমণ কৰাৰ পিছত এই যুদ্ধ আৰম্ভ হৈছিল। হামাছৰ আক্ৰমণত প্ৰায় ১২০০ ইজৰাইলী নিহত হোৱাৰ লগতে ২৪০ৰো অধিক লোকক পণবন্দী কৰি ৰখা হয়।
উল্লেখ্য যে, হামাছে জেৰুজালেমৰ পুৰণি চহৰত অৱস্থিত আল-আকছা মছজিদৰ বিৰুদ্ধে ইজৰাইল কৰ্তৃপক্ষৰ আক্ৰমণাত্মক কাৰ্য্যৰ প্ৰতিক্ৰিয়া বুলি অভিহিত কৰিছে। ইয়াৰ পিছত ইজৰাইলে যুদ্ধ ঘোষণা কৰি ২৩ লাখ পেলেষ্টাইনী বসবাস কৰা গাজা ষ্ট্ৰিপ সম্পূৰ্ণৰূপে অৱৰোধ কৰে, তাৰ পিছত ইজৰাইলে গাজাত আজিলৈকে স্থলভিত্তিক পদক্ষেপ অব্যাহত ৰাখিছে। ইয়াৰ উপৰিও ইজৰাইলে লেবানন আৰু ছিৰিয়াৰ কিছু অংশত বিমান আক্ৰমণ আৰম্ভ কৰিছে আৰু পশ্চিম পাৰতো সংঘৰ্ষ চলি আছে।
