যুদ্ধবিৰতিৰ পিছতো গাজাত পুনৰ ইজৰাইল আৰু হামাছৰ মাজত শত্ৰুতা আৰম্ভ হৈছে। ইফালে, ১৯ অক্টোবৰত গাজাত ইজৰাইলৰ সেনাই বিমান আক্ৰমণ চলায়। অৱশ্যে এই আক্ৰমণ সন্দৰ্ভত এতিয়াও ইজৰাইলে কোনো আনুষ্ঠানিক বিবৃতি প্ৰকাশ কৰা নাই।
ইজৰাইলৰ সংবাদ মাধ্যমৰ এক প্ৰতিবেদন অনুসৰি, আই ডি এফে গাজাৰ ৰাফাহ অঞ্চলত এই আক্ৰমণ সংঘটিত কৰিছিল। এই আক্ৰমণৰ সময়তে আমেৰিকাই হামাছে গাজা ষ্ট্ৰিপত পেলেষ্টাইনীসকলৰ ওপৰত আক্ৰমণৰ পৰিকল্পনা কৰাৰ অভিযোগ উত্থাপন কৰিছে। এক প্ৰতিবেদন অনুসৰি গাজা ষ্ট্ৰিপত উগ্ৰপন্থীয়ে ৰাফাত ইজৰাইলী বাহিনীৰ ওপৰত কৰা আক্ৰমণৰ প্ৰতিক্ৰিয়া স্বৰূপে এই বিমান আক্ৰমণ কৰা হৈছে।
আইডিএফৰ তথ্য অনুসৰি শুকুৰবাৰে (১৭ অক্টোবৰ ২০২৫) ৰাফাহ অঞ্চলৰ এটা সুৰংগৰ পৰা কেইবাটাও উগ্ৰপন্থীয়ে ওলাই আহি ইজৰাইলৰ সৈন্যৰ ওপৰত গুলীচালনা কৰে। কোনো লোক হতাহতি হোৱা নাই।
আকৌ চোৰাংচোৱা তথ্যৰ উদ্ধৃতি দি আমেৰিকাই অভিযোগ কৰিছে যে হামাছে গাজাৰ বাসিন্দাসকলক আক্ৰমণ কৰাৰ পৰিকল্পনা কৰিছে আৰু তাৰ পিছত যুদ্ধবিৰতি ভংগ কৰিছে। ইজৰাইলৰ প্ৰধানমন্ত্ৰী নেতানিয়াহুৱে শনিবাৰে (১৯ অক্টোবৰ, ২০২৫) সকীয়াই দিছিল যে হামাছ সম্পূৰ্ণৰূপে নিৰস্ত্ৰ নোহোৱালৈকে গাজাৰ যুদ্ধ শেষ নহ’ব।
ইজৰাইলৰ প্ৰধানমন্ত্ৰী নেতান্যায়াহুৱে কয় যে হামাছে সকলো পণবন্দীক ঘূৰাই দি চুক্তিৰ চৰ্তসমূহ পূৰণ কৰিলেহে ৰাফাহ ক্ৰছিং মুকলি কৰা হ’ব। ১০ অক্টোবৰৰ চুক্তি অনুসৰি হামাছে আইডিএফ গাজালৈ উভতি অহাৰ ৭২ ঘণ্টাৰ ভিতৰত ২০ জন জীৱিত পণবন্দীক মুকলি কৰি দি ২৮ জন মৃত পণবন্দীৰ মৃতদেহ গতাই দিব লাগিছিল। অৱশ্যে তাৰ পিছত হামাছে মাত্ৰ ১০টা মৃতদেহহে ঘূৰাই আনিছে।
