নলবাৰী সমষ্টিৰ খাতিকুছি আল্লিয়া গাঁও পঞ্চায়তৰ এগৰাকী প্ৰাৰ্থীসহ চাৰিজন কংগ্ৰেছী কৰ্মীক ঘগ্ৰাপাৰ আৰক্ষীয়ে আটক কৰাৰ খবৰ আহিছে। শাসকীয় বিজেপি দলৰ প্ৰাৰ্থীৰ নিৰ্বাচনী পোষ্টাৰ ফালি পেলোৱাৰ অভিযোগত আটক কৰে চাৰিগৰাকী কংগ্ৰেছ কৰ্মীক৷ আটাই কেইজনকে সোমবাৰে নিশা আৰক্ষীয়ে আটক কৰে বুলি জানিব পৰা গৈছে।
আৰক্ষীয়ে আটক কৰা সকলৰ ভিতৰত খাতিকুছি আল্লিয়া গাঁও পঞ্চায়তৰ বনগাঁও ৱাৰ্ড সদস্য পদৰ প্ৰাৰ্থী বাবুল দাসো আছে৷ আৰক্ষীয়ে আটক কৰা আন তিনি গৰাকী কংগ্ৰেছ কৰ্মী হৈছে দয়াময় দাস, হৰিচৰণ দাস আৰু যদু দাস৷
ইপিনে এই চাৰিগৰাকী কংগ্ৰেছীক ষড়যন্ত্ৰমূলক আৰু মিছা অভিযোগৰ ভিত্তিত আৰক্ষীয়ে আটক কৰাৰ অভিযোগ তুলি ক্ষুব্ধ হৈ পৰিছে কংগ্ৰেছ নেতৃত্ব। দলটোৰ নেতা তথা প্ৰাক্তন বিধায়ক অশোক শৰ্মাই ঘগ্ৰাপাৰ থানাত উপস্থিত হৈ আৰক্ষীয়ে আটক কৰা কংগ্ৰেছ কৰ্মী কেইজনক মুকলি কৰি দিয়াৰ দাবী জনায়৷
প্ৰাক্তন বিধায়কগৰাকীৰ দাবীৰ পিছতো সু-ব্যৱস্থা গ্ৰহণ নকৰাত আৰক্ষীৰ ভূমিকা সন্দেহজনক বুলি অভিযোগ তুলি ক্ষুদ্ধ কংগ্ৰেছ কৰ্মীসকলে থানা চৌহদতে বিভিন্ন শ্লোগান দি পৰিৱেশ উত্তাল কৰি তোলে৷
