ইংলেণ্ডৰ বিৰুদ্ধে ২-১ ব্যৱধানত পিছ পৰি থকা ভাৰতীয় ক্ৰিকেট দলৰ অনুৰাগীৰ বাবে এটা বেয়া খবৰ। ২৩ জুলাই অৰ্থা বুধবাৰৰ পৰা মানচেষ্টাৰত আৰম্ভ হ’বলগীয়া শৃংখলাৰ চতুৰ্থখন মেচৰ পৰা বাহিৰ হ’ল ভাৰতীয় দলৰ বেগী বলাৰ আকাশ দ্বীপ। অধিনায়ক শুভমন গিলে সংবাদ মাধ্যমৰ জৰিয়তে এই কথা জনায়।
অধিনায়ক গিলে জানিব দিয়া অনুসৰি, শৃখংলাৰ চতুৰ্থখন মেচৰ পূৰ্বে ভাগ লোৱা অনুশীলনৰ সময়ত আঘাতপ্ৰাপ্ত হয় আকাশ দ্বীপ।
উল্লেখ্য যে, চতুৰ্থখন মেচৰ পূৰ্বে একাধিক সমস্যাই দেখা দিছে ভাৰতীয় শিৱিৰত। ইতিমধ্যেই শৃংখলাৰ পৰা বাহিৰ হৈছে নীতিশ ৰেড্ডী। আনহাতে অৰ্শদ্বীপ সিঙো আঘাতৰ বাবে চতুৰ্থখন টেষ্টত খেলিব নোৱাৰে।
এই দুজনৰ উপৰি শেহতীয়াকৈ আকাশ দ্বীপো আঘাতৰ বাবে অতি গুৰুত্বপূৰ্ণ মেচখনৰ পৰা বাহিৰ হোৱাত চিন্তিত হৈ পৰিছে দলীয় মেনেজমেণ্ট।
আঘাতৰ সমস্যাৰে জৰ্জৰিত ভাৰতীয় দলত হয়টো অংশুল কম্বোজৰ অভিষেক হ’ব পাৰে। মেচৰ আৰম্ভণিৰ এদিন পূৰ্বে অৰ্থাত আজি অধিনায়ক শুভমন গিলে সংবাদমেলৰ জৰিয়তে এই ইংগিত প্ৰদান কৰিছে। চতুৰ্থখন মেচত ভাৰতীয় দলত দুটাকৈ গুৰুত্বপূৰ্ণ সালসলনি হোৱাটো নিশ্চিত।
সমতা স্থাপনৰ লক্ষ্যৰে খেলপথৰাত নামিবলগীয়া ভাৰতীয় দলত যশপ্ৰীত বুমৰাহৰ স্থানো নিশ্চিত বুলি ইংগিত প্ৰদান কৰিছে অধিনায়ক গিলে।
