ইজৰাইল আৰু হামাছৰ মাজত হোৱা যুদ্ধবিৰতি আৰু পণবন্দী মুক্তিৰ চুক্তিৰ অধীনত ২৫ জানুৱাৰী অৰ্থাৎ শনিবাৰে ইজৰাইলৰ চাৰিজন পণবন্দীক মুকলি কৰি দিয়া হ’ব।
৪৭৭ দিনৰ পাছত হামাছে মুকলি কৰিবলৈ ওলোৱা ৪ জন পণবন্দীৰ সকলো মহিলা। ইজৰাইলৰ পণবন্দীসকলৰ নামো প্ৰকাশ কৰিছে হামাছে।
যুদ্ধবিৰতি চুক্তিৰ অধীনত হামাছে ৪ ইজৰাইলী পণবন্দীক মুকলি কৰি দিবলৈ সন্মত হয়। শুকুৰবাৰে হামাছে পণবন্দী ৪ জনৰ নামো প্ৰকাশ কৰি গাজা ষ্ট্ৰিপত যুদ্ধবিৰতিৰ অংশ হিচাপে শনিবাৰে তেওঁলোকক মুকলি কৰি দিব বুলি উল্লেখ কৰে।
হামাছে কয় যে, এই ৪ মহিলা ইজৰাইলী সৈনিক, যাৰ নাম কাৰিনা আৰিভ, ডেনিয়েলা গিলব’য়া, নামা লেভি আৰু লিৰি আলবাগ। এই ৪ মহিলাক ২০২৩ চনৰ ৭ অক্টোবৰত ইজৰাইলৰ ওপৰত হামাছৰ আক্ৰমণৰ সময়ত নাহাল অজ সেনা ঘাটিৰ পৰা অপহৰণ কৰা হৈছিল।
হামাছৰ সন্ত্ৰাসবাদীয়ে নাহাছ ঘাটিৰ পৰা ৭ গৰাকী মহিলা সৈনিকক অপহৰণ কৰিছিল, এই চাৰিগৰাকী মহিলা সৈনিকো ইয়াৰ ভিতৰত আছিল।
ইয়াৰ বিনিময়ত ইজৰাইলে কাৰাগাৰত বন্দী বা আটক কৰি ৰখা কেইবা ডজন পেলেষ্টাইনীক মুকলি কৰি দিয়া হ’ব বুলি সংস্থাটোৱে প্ৰকাশ কৰিছে। ইজৰাইল আৰু হামাছৰ মাজত ছয় সপ্তাহৰ যুদ্ধবিৰতিৰ ষষ্ঠ দিনত ভৰি দিছে। এনে পৰিস্থিতিত বৰ্তমানলৈকে হামাছে কিমান পণবন্দী এতিয়াও জীয়াই আছে, সেই সম্পৰ্কে কোনো সঠিক তথ্য প্ৰকাশ কৰা নাই।
বিগত দেওবাৰে কাৰ্যকৰী হোৱা গাজা যুদ্ধবিৰতি চুক্তিৰ অধীনত দ্বিতীয়বাৰৰ বাবে পণবন্দী আৰু কয়দীৰ আদান-প্ৰদান কৰা হ’ব। প্ৰথম শ্বেপৰ সময়ত হামাছে ৯০ জন পেলেষ্টাইনী বন্দীৰ বিনিময়ত ৩ ইজৰাইলী পণবন্দীক মুকলি কৰি দিছিল। এই যুদ্ধবিৰতিৰ ফলত গাজাত ১৫ মাহজোৰা যুদ্ধ সাময়িকভাৱে বন্ধ হৈ পৰিছে।
উল্লেখ্য যে, ২০২৩ চনৰ ৭ অক্টোবৰত ইজৰাইলক হামাছে আক্ৰমণ কৰিছিল, য’ত ১২০০ ইজৰাইলী নিহত হৈছিল। এই সময়ছোৱাত হামাছৰ যোদ্ধাসকলে ২৫১ জন ইজৰাইলীক পণবন্দী কৰি লৈ যায়।
ইফালে, হামাছৰ আক্রমণৰ পাছত ইজৰাইলৰ প্রতিশোধমূলক কার্যত ৪৭ হাজাৰতকৈ অধিক পেলেষ্টাইনী নিহত হোৱা বুলি হামাছৰ পৰিচালিত স্বাস্থ্য মন্ত্র্যালয়ে অৱগত কৰে৷
