ইজৰাইল আৰু হামাছৰ মাজত চলি থকা যুদ্ধৰ মাজতে ডাঙৰ মন্তব্য কৰিছে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে। ইজৰাইলৰ সৈন্য বাহিনীৰ আক্ৰমণত হামাছৰ গাজাৰ মুৰব্বী মহম্মদ ছিনৱাৰ নিহত হোৱা বুলি দাবী কৰিছে ইজৰাইলৰ প্ৰধানমন্ত্ৰীয়ে।
উল্লেখ্য যে যোৱা বছৰ ইজৰাইলৰ সৈন্যৰ সৈতে হোৱা গুলীচালনাত নিহত হোৱা হামাছৰ প্ৰাক্তন নেতা ইয়াহিয়া ছিনৱাৰৰ কনিষ্ঠ ভাতৃ আছিল মহম্মদ ছিনৱাৰ।
১৪ মে’ত ইজৰাইল সেনাই চলোৱা বিমান আক্ৰমণত হামাছৰ মুৰব্বীজন গুৰুতৰভাৱে আহত হোৱাৰ খবৰ প্ৰকাশ পাইছিল। সেই সময়ত ইজৰাইলৰ প্ৰতিৰক্ষা বাহিনী বা আইডিএফে এই আক্ৰমণত হামাছৰ মুৰব্বীজন নিহত হৈছে নে নাই সেয়া নিশ্চিত কৰিব পৰা অৱস্থাত নাছিল।
গাজাত হামাছৰ অন্তিমগৰাকী শীৰ্ষ পৰ্যায়ৰ নেতা মহম্মদ ছিনৱাৰ দীৰ্ঘ সময়ৰ পৰা লুকাই আছিল বুলি তথ্য প্ৰকাশ পাইছিল। নেতাগৰাকী লুকাই থকা ঠাইখিনি কমাণ্ড চেণ্টাৰ হিচাপে ব্যৱহাৰ কৰা হৈছিল।
কিন্তু ১৪ মে’ত ইজৰাইলৰ প্ৰতিৰক্ষা বাহিনীয়ে সেই ঠাইখিনিত সঠিক ড্ৰ’ন আক্ৰমণ চলাই আৰু এই আক্ৰমণতেই শীৰ্ষ নেতাগৰাকীৰ মৃত্যু হয়।
