ভাৰতীয় ক্ৰিকেট দলৰ প্ৰাক্তন ক্ৰিকেটাৰ হৰভজন সিঙে লাভ কৰিব পাৰে বিচিচিআইৰ গুৰুত্বপূৰ্ণ পদবী। কিয়নো ২৮ ছেপ্তেম্বৰত মুম্বাইত অনুষ্ঠিত হ’বলগীয়া বিচিচিআইৰ বাৰ্ষিক সভাৰ বাবে পঞ্জাৱ ক্ৰিকেট এছ’চিয়েশ্যনে হৰভজন সিঙক নিজৰ প্ৰতিনিধি হিচাপে ঘোষণা কৰিছে।
ইয়াৰ পূৰ্বে এছ’চিয়েশ্যন অৱ বেংগলেও নিজৰ প্ৰতিনিধি হিচাপে ঘোষণা কৰিছে সৌৰভ গাংগুলীৰ নাম। দুয়োখন ৰাজ্যৰ ক্ৰিকেট ব’ৰ্ডে নিজৰ নিজৰ প্ৰতিনিধি হিচাপে এই দুগৰাকী প্ৰাক্তন ক্ৰিকেটাৰক নিৰ্বাচিত কৰা ঘটনাই দেশৰ ক্ৰিকেট মহলত ব্যাপক চৰ্চা লাভ কৰিছে।
ইতিমধ্যে, বিভিন্ন আগশাৰীৰ ৰাষ্ট্ৰীয় সংবাদ মাধ্যমত চৰ্চা চলিছে যে আগন্তুক বিচিচিআই নিৰ্বাচনত এই দুগৰাকী প্ৰাক্তন ক্ৰিকেটাৰে কোনো পদবীৰ বাবে প্ৰতিদ্বন্দ্বিতা কৰাৰ যো-জা চলাইছে, আৰু সেয়ে তেওঁলোকক নিজৰ নিজৰ ৰাজ্যিক ব’ৰ্ডে প্ৰতিনিধি হিচাপে প্ৰেৰণ কৰাৰ সিদ্ধান্ত লৈছে।
উল্লেখ্য যে, ২৮ ছেপ্টেম্বৰ দিনা অনুষ্ঠিত হ’ব বিচিচিআইৰ নিৰ্বাচন। এই দিনটোতেই নিৰ্বাচন কৰা হ’ব বিচিচিআইৰ পৰৱৰ্তী অধ্যক্ষ।
ইয়াৰ পূৰ্বে হৰভজন সিঙক পঞ্জাৱ ক্ৰিকেট সন্থাৰ উপদেষ্টা হিচাপে নিযুক্তি দিয়া হৈছিল। এইবাৰ ৰাজ্যিক ক্ৰিকেট সন্থাৰ প্ৰতিনিধি হিচাপে তেওঁক দেখা পোৱা যাব।
ৰাজ্যৰ সকলো ক্ৰিকেট সন্থালৈ জাননী প্ৰেৰণ কৰা হৈছে যে তেওঁলোকৰ প্ৰতিনিধি ঘোষণাৰ অন্তিম তাৰিখ হ’ব ১২ ছেপ্টেম্বৰ।
একে সময়তে নিৰ্বাচনী বিষয়াই আবেদনৰ অন্তিম তাৰিখ ২০ ছেপ্টেম্বৰৰ পৰা ২১ ছেপ্টেম্বৰলৈ বৃদ্ধি কৰিছে। কোনো প্ৰাৰ্থীয়ে ইচ্ছা কৰিলে ২৩ ছেপ্টেম্বৰলৈ নাম প্ৰত্যাহাৰ কৰিব পাৰিব আৰু ২৮ ছেপ্টেম্বৰত নিৰ্বাচন অনুষ্ঠিত হ’ব।
২৮ ছেপ্টেম্বৰত অনুষ্ঠিত হ’বলগীয়া বৈঠকত সভাপতি, উপ-সভাপতি, সচিব, যুটীয়া সচিব আৰু কোষাধ্যক্ষ পদৰ ওপৰত সিদ্ধান্ত লোৱাৰ কথা।
