মুম্বাই ইণ্ডিয়ানছৰ অধিনায়ক হৰমনপ্ৰীত কৌৰক ইউ পি ৱাৰিয়ৰ্ছৰ বিৰুদ্ধে মহিলা প্ৰিমিয়াৰ লীগৰ (ডব্লিউ পি এল) খেলৰ সময়ত আম্পায়াৰৰ সিদ্ধান্তত মতানৈক্য প্ৰকাশ কৰাৰ বাবে মেচ মাচুলৰ ১০ শতাংশ জৰিমনা বিহা হৈছে।
ইউ পি ৱাৰিয়ৰ্ছৰ ইনিংছৰ ১৯ নং অভাৰত আম্পায়াৰ অজিতেশ আৰগালে হৰমনপ্ৰীত কৌৰক কয় যে লেহেমীয়া অভাৰ ৰেটৰ বাবে অন্তিম অভাৰত মাত্ৰ তিনিজন ফিল্ডাৰহে চাৰ্কলৰ বাহিৰত থাকিব পাৰে।
এই কথাত ক্ষুন্ন হৈ হৰমনপ্ৰীতে আম্পায়াৰৰ সৈতে বাক বিতণ্ডাত লিপ্ত হয় আৰু এই ক্ষেত্ৰত তেওঁক সহযোগ কৰে এমেলিয়া কেৰেও।
মহিলা প্ৰিমিয়াৰ লীগে বিবৃতিৰ জৰিয়তে কয়, ‘খেলৰ সময়ত আম্পায়াৰৰ সিদ্ধান্তত মতানৈক্য প্ৰকাশ কৰাৰ বাবে হৰমনপ্ৰীত কৌৰে আইচিচিৰ আচৰণ বিধিৰ ২.৮ অনুচ্ছেদৰ অধীনত লেভেল ১ অপৰাধ স্বীকাৰ কৰিছে। স্তৰ ১ অপৰাধত মেচ ৰেফাৰীৰ সিদ্ধান্ত চূড়ান্ত আৰু বাধ্যতামূলক।’
উল্লেখ্য যে, বৃহস্পতিবাৰে মহিলা প্ৰিমিয়াৰ লীগ (ডব্লিউ পি এল)ৰ এখন খেলত ৯টা বল বাকী থকা অৱস্থাত ইউ পি ৱাৰিয়ৰ্ছক ৬ উইকেটত পৰাস্ত কৰে প্ৰাক্তন চেম্পিয়ন মুম্বাই ইণ্ডিয়ানছে। এই জয়ত গুৰুত্বপূৰ্ণ ভূমিকা গ্ৰহণ কৰে আমেলিয়া কেৰ (৫ উইকেট) আৰু হেলী মেথিউছৰ অল ৰাউণ্ড প্ৰদৰ্শন (৬৮ ৰান, ২ উইকেট)।
এই জয়ৰ জৰিয়তে মুম্বাই ইণ্ডিয়ানছে নিজৰ নেট ৰান ৰেট বৃদ্ধি কৰি ৮ পইণ্টেৰে দ্বিতীয় স্থানত উপনীত হয়। তালিকাৰ প্ৰথম স্থানত আছে দিল্লী কেপিটেলছ।
