মঙলবাৰে পুৱা সংঘটিত এক ভয়ংকৰ পথ দুৰ্ঘটনাত উত্তৰ প্ৰদেশৰ কাছগঞ্জ জিলাৰ কচ্চলা আৰক্ষী চকীৰ উপ-পৰিদৰ্শকৰ মৃত্যু হয়। প্ৰাতঃভ্ৰমণ কৰিবলৈ যোৱাৰ সময়তে অচিনাকী বাহনৰ খুন্দাত প্ৰাণ হেৰুৱাই আৰক্ষী উপ-পৰিদৰ্শক প্ৰহ্লাদ সিং জাদোনে।
জানিব পৰা মতে, উপ-পৰিদৰ্শক প্ৰহ্লাদ সিং জাদোনে প্ৰতিদিনাৰ দৰে আজিও ৰাতিপুৱা প্ৰাতঃভ্ৰমণৰ বাবে ওলাই গৈছিল। সেই সময়তে এখন অজ্ঞাত বাহনে আৰক্ষী বিষয়াজনক প্ৰচণ্ড জোৰত খুন্দা মাৰে। দুৰ্ঘটনাটো ইমানেই ভয়ংকৰ আছিল যে আৰক্ষী বিষয়াজনে ঘটনাস্থলতে মৃত্যুক সাৱটি লয়।
মৃত্যু হোৱা আৰক্ষী উপ-পৰিদৰ্শক প্ৰহ্লাদ সিং মূলতঃ মথুৰা অঞ্চলৰ নৰী গাঁৱৰ বাসিন্দা আছিল। তেওঁ বিগত এটা বছৰ ধৰি কচ্চলা আৰক্ষী চকীৰ প্ৰভাৰী হিচাপে দায়িত্ব পালন কৰি আছিল। প্ৰায় দুবছৰ পূৰ্বে তেওঁ উপ-পৰিদৰ্শক হিচাপে পদোন্নতি লাভ কৰিছিল।
ইফালে আৰক্ষীয়ে উপ-পৰিদৰ্শকজনৰ আত্মীয়ক দুৰ্ঘটনাৰ বিষয়ে জানিবলৈ দি কাছগঞ্জলৈ মাতি আনিছে। লগতে এই ঘটনা সংঘটিত কৰা বাহনখন আৰু ইয়াৰ চালকৰ সন্ধান উলিয়াবলৈ আৰম্ভ কৰা হৈছে অভিযান।
আৰক্ষীয়ে অঞ্চলটোত স্থাপন কৰা চিচিটিভি কেমেৰাৰ তদন্তও অব্যাহত ৰাখিছে। এই ঘটনাৰ বাবে শোক প্ৰকাশ কৰিছে আৰক্ষী বিভাগে।
