বিহাৰৰ ৰাজগীৰত চলি থকা হকী এছিয়া কাপৰ প্ৰথমখন মেচত ৰোমাঞ্চকৰ বিজয় সাব্যস্ত কৰিছে আয়োজক দেশ ভাৰতে। পুল এ’ৰ মেচখনত ভাৰতে চীনক ৪-৩ গ’লত পৰাস্ত কৰে। অধিনায়ক হৰমনপ্ৰীত সিঙৰ হেট্ৰিক আৰু জুগৰাজ সিঙৰ এটা গ’লৰ সহায়ত মেচখনত জয়ী হয় ভাৰত।
আয়োজক ভাৰতৰ বাবে এয়া এক সুন্দৰ আৰম্ভণি, যাৰ লক্ষ্য হ’ব এছিয়া কাপ জয় আৰু এফ আই এইচ হকী বিশ্বকাপৰ বাবে প্ৰত্যক্ষ অৰ্হতা লাভ কৰা।
পুৰুষৰ এছিয়া কাপ এছিয়ান হকীৰ অন্যতম সন্মানীয় ইভেণ্ট। এই প্ৰতিযোগিতাখনত ডিফেণ্ডিং চেম্পিয়ন দক্ষিণ কোৰিয়া পাঁচবাৰ খিতাপ দখল কৰি সৰ্বাধিক সফল দল হোৱাৰ বিপৰীতে ভাৰতে তিনিবাৰ খিতাপ দখল কৰি দ্বিতীয় স্থানত আছে।
পূৰ্বৰ সংস্কৰণত ভাৰতে তৃতীয় স্থান দখল কৰিছিল কাৰণ ছেমিফাইনেল মেচত দক্ষিণ কোৰিয়াৰ বিৰুদ্ধে ড্ৰ’ খেলিছিল। গ’ল ব্যৱধান অধিক হোৱাৰ বাবে দক্ষিণ কোৰিয়াই ফাইনেলত প্ৰৱেশ কৰিছিল আৰু চেম্পিয়ন হৈছিল।
