এছিয়ান চেম্পিয়ন হিচাপে পৰিগণিত হৈছে হৰমনপ্ৰীত সিং নেতৃত্বাধীন ভাৰতীয় দল। বিহাৰৰ ৰাজগীৰত অনুষ্ঠিত হোৱা পুৰুষ এছিয়া কাপ ২০২৫ৰ ফাইনেলত আজি ডিফেণ্ডিং চেম্পিয়ন দক্ষিণ কোৰিয়াক পৰাস্ত কৰে ভাৰতে। ভাৰতে ডিফেণ্ডিং চেম্পিয়ন দক্ষিণ কোৰিয়াক ৪-১ গ’লৰ ব্যৱধানত একপক্ষীয়ভাৱে পৰাস্ত কৰে।
হকী এছিয়া কাপ ২০২৫ৰ খিতাপ মেচত ভাৰতে দক্ষিণ কোৰিয়াক ৪-১ গ’লত পৰাস্ত কৰে।ফাইনেলত ভাৰতে এক সুন্দৰ আৰম্ভণি কৰিছিল, প্ৰথম মিনিটতে সুখজীতে এটা গ’ল দিছিল। গোটেই খেলখনত কোৰিয়াক ডিফেণ্ডিং মোডত আৰু ভাৰতীয় খেলুৱৈক আক্রমণাত্মক মোডত দেখা যায়৷
চেম্পিয়ন হোৱাৰ সমান্তৰালকৈ ভাৰতীয় হকী দলটোৱে অহা বছৰ বেলজিয়াম আৰু নেদাৰলেণ্ডত অনুষ্ঠিত হ’বলগীয়া বিশ্বকাপৰ বাবেও যোগ্যতা অৰ্জন কৰিছে। এয়া ভাৰতৰ চতুৰ্থটো হকী এছিয়া কাপ খিতাপ।
উল্লেখ্য যে, ভাৰতে চতুৰ্থবাৰৰ বাবে হকী এছিয়া কাপৰ খিতাপ দখল কৰিছে। এই জয়ৰ বিশেষ কাৰণ ভাৰতে ৫ বাৰৰ চেম্পিয়ন দক্ষিণ কোৰিয়াক পৰাস্ত কৰিছে।ইয়াৰ পূৰ্বে ২০১৭ চনত ভাৰতে মালয়েছিয়াক পৰাস্ত কৰি এছিয়া কাপ জয় কৰিছিল।
এইদৰে সুদীৰ্ঘ ৮ বছৰৰ অপেক্ষাৰ অন্ত পেলাই ভাৰতীয় দলে পুৰুষ হকী এছিয়া কাপত শ্ৰেষ্ঠত্ব অৰ্জন কৰিছে।
