দক্ষিণ শালমাৰা মানকাচৰ জিলাৰ ফেকামাৰী কস্তুৰবা গান্ধী বালিকা বিদ্যালয়ৰ ছাত্ৰী আৱাসত সংঘটিত হৈছে এক চাঞ্চল্যকৰ ঘটনা।
আৱাসিক ছাত্ৰীসকলৰ নামত অহা ধন আত্মসাত কৰাৰ লগতে আৱাসিক ছাত্ৰীসকলক অশ্লীল ইঙ্গিত দিয়াৰ এক গুৰুত্বৰ অভিযোগ উত্থাপন হৈছে৷ এই অভিযোগ দিছে বিদ্যালয়খনৰ ছাত্ৰীসকলৰ অভিভাৱকে।
এই অভিযোগ উত্থাপন হৈছে ছাত্ৰী আৱাসৰ ৱাৰ্ডেন বেগম ফাতেমা মনছুৰা আৰু কেয়াৰ টেকাৰৰ মতিউৰ ৰহমান বিৰুদ্ধে৷
উল্লেখ্য যে, দক্ষিণ শালমাৰা মানকাচৰ জিলাৰ ফেকামাৰী কস্তুৰীবা গান্ধী বালিকা বিদ্যালয়ৰ আৱাসিক ছাত্ৰীৰ নামত অহা চৰকাৰী ধনৰ পৰা ছাত্ৰীসকলক বঞ্চিত কৰি ৱাৰ্ডেন বেগম ফাতেমা মনছুৰা আৰু কেয়াৰ টেকাৰ মতিউৰ ৰহমানে মিলি আত্মসাত কৰা বুলি দাবী কৰিছে স্থানীয় ৰাইজৰ লগতে অভিভাৱকসকলে।
ইয়াৰ উপৰিও মতিউৰ ৰহমানে নাৱালিকা ছাত্ৰীসকলক অশ্লীল ইঙ্গিত দিয়াৰো এক গুৰুতৰ অভিযোগ উত্থাপন কৰি জিলা আয়ুক্তক এখন লিখিত অভিযোগ দাখিল কৰে অভিভাৱসকলে।
জিলা আয়ুক্তক দিয়া অভিযোগত উল্লেখ কৰা অনুসৰি, আৱসিক বিদ্যালয়খনত অধ্যায়নৰত ছাত্ৰীসকলৰ আবন্টিন খোৱা-বোৱাৰ লগতে অন্যান্য সা-সুবিধাৰ নামত অহা ধনৰ পৰা ছাত্ৰীসকলক বঞ্চিত কৰি সমুদায় ধন ৱাৰ্ডেন বেগম ফাতেমা মনছুৰা আৰু কেয়াৰ টেকাৰৰ মতিউৰ ৰহমান আত্মসাৎ কৰি আহিছে।
ইয়াৰ উপৰিও আন এক গুৰুতৰ অভিযোগ উত্থাপন কৰিছে কেয়াৰ টেকাৰ মতিউৰ ৰহমানৰ বিৰুদ্ধে৷ যেতিয়াই তেতিয়াই বিনা অনুমতিত হোষ্টেলত প্রৱেশ কৰি ছাত্ৰীসকলক অশ্লীল ইংগিত দিয়াৰ লগতে ছাত্ৰীসকলৰ গা-ধোৱা সময়তো সেই ঠাইত প্ৰৱেশ কৰি অশ্লীল ইংগিত দিয়ে। যাৰ বাবে কিছুমান ছাত্ৰীয়ে হোষ্টেল এৰিবলৈ বাধ্য হৈছে। ছাত্ৰীসকলে হোষ্টেলত গা-ধুৱাৰ সু-ব্যৱস্থা নথকাৰ কাৰণে দমকলৰ পাৰতে গা-ধুব লাগে আৰু এই গা-ধুৱা সময়তেই মতিউৰ ৰহমানে দমকলৰ পাৰত উপস্থিত হয় বুলি ছাত্ৰীসকলে অভিযোগ উত্থাপন কৰিছে৷
