আন্তঃৰাষ্ট্ৰীয় ক্ৰিকেট পৰিষদে (আই চি চি) এগৰাকী ভাৰতীয় খেলুৱৈ আৰু ইংলেণ্ড দলক জৰিমনা বিহিছে। শুকুৰবাৰে ভাৰতীয় মহিলা ক্ৰিকেট দলৰ বেটছমেন প্ৰতীকা ৰাভাল আৰু ইংলেণ্ডৰ মহিলা ক্ৰিকেট দলক আচৰণ বিধি উলংঘা কৰাৰ অভিযোগত আইচিচিয়ে জৰিমনা বিহিছে।
এদিনীয়া শৃংখলাৰ প্ৰথমখন মেচত পৃথকে পৃথকে সংঘটিত দুটাকৈ কাণ্ডত লেভেল ৱান উলংঘা কৰাৰ বাবে মেচ মাচুলৰ ১০ শতাংশ জৰিমনা বিহা হৈছে প্ৰতিকা ৰাভালক আৰু অনুশাসনমূলক ৰেকৰ্ডত এটা ডিমেৰিট পইণ্ট সংযোজন কৰা হৈছে।
উল্লেখ্য যে, ইনিংছৰ ১৮ নং অ’ভাৰৰ সময়ত ইংলেণ্ডৰ বলাৰ লৰেন ফাইলাৰৰ সৈতে অপ্ৰয়োজনীয় শাৰীৰিক সংস্পৰ্শ আৰু পৰৱৰ্তী অ’ভাৰত ছফী এক্লেষ্টোনৰ সৈতেও একেই আচৰণ কৰাৰ অভিযোগত ৰাভালক দোষী সাব্যস্ত কৰা হৈছে।
আই চি চিয়ে নিজৰ ৱেবছাইটত প্ৰকাশ কৰা এক বিবৃতিত কয় যে ভাৰতীয় অ’পেনাৰগৰাকীক অলপ সময়ৰ ভিতৰত সংঘটিত হোৱা দুটা পৃথক কাণ্ডৰ বাবে শাস্তি প্ৰদান কৰা হৈছে। ১৮ নং অভাৰত ৰান লোৱাৰ সময়ত বলাৰ লৰেন ফাইলাৰৰ সৈতে শাৰীৰিক সংঘাত হৈছিল, যিটো তেওঁ এৰাই চলিব লাগিছিল। পৰৱৰ্তী অভাৰত আউট হোৱাৰ পিছত ড্ৰেছিং ৰুমলৈ উভতি অহাৰ সময়ত তেওঁ বলাৰ ছফী এক্লেষ্টোনৰ সৈতেও অনুৰূপ কাৰ্য সংঘটিত কৰিছিল।
এইদৰে ৰাভালৰ ৰেকৰ্ডত এটা ডিমেৰিট পইণ্ট যোগ কৰা হ’ল কাৰণ ২৪ মাহৰ ভিতৰত এইটো তেওঁৰ প্ৰথম অপৰাধ আছিল।
আইচিচিয়ে লগতে কয় যে ইংলেণ্ড দলটোৱে নিৰ্দিষ্ট সময়ত এটা অভাৰ কমকৈ বলিং কৰাৰ বাবে মন্থৰ অভাৰ ৰেটৰ বাবে মেচ মাচুলৰ পাঁচ শতাংশ জৰিমনা বিহা হৈছে।
বিবৃতি অনুসৰি প্ৰতীকা ৰাভাল আৰু ইংলেণ্ডৰ অধিনায়ক নেট স্কাইভাৰ-ব্ৰুণ্টে মেচ ৰেফাৰীৰ সন্মুখত তেওঁলোকৰ ভুল স্বীকাৰ কৰিছিল আৰু যাৰ বাবে আনুষ্ঠানিক শুনানিৰ প্ৰয়োজন নহ’ল।
উল্লেখ্য যে, সম্প্ৰতি ইংলেণ্ড ভ্ৰমণত থকা ভাৰতীয় মহিলা ক্ৰিকেট দলটোৱে তিনিখন মেচৰ এদিনীয়া শৃংখলা খেলাত ব্যস্ত। পাঁচখন মেচৰ টি-২০ শৃংখলা দখলৰ পিছত এদিনীয়া শৃংখলাটোও ভাৰতে জয়েৰে অভিযান আৰম্ভ কৰিছে। ভাৰতীয় দলে টি-২০ শৃংখলাটো ৩-২ ব্যৱধানত জয়ী হৈছিল।
