ভাৰতীয় প্ৰযুক্তিবিদ্যা প্ৰতিষ্ঠান (আইআইটি) গুৱাহাটীৰ আন এজন ছাত্ৰই লোৱা চৰম সিদ্ধান্তই এক আলোড়নৰ সৃষ্টি কৰিছে।৮ মাহৰ ভিতৰত গুৱাহাটী আইআইটিত সংঘটিত চতুৰ্থ আত্মহত্যাৰ ঘটনাই চাঞ্চল্যৰ সৃষ্টি কৰিছে।
মূলতঃ উত্তৰ প্ৰদেশৰ ছাত্ৰজনে কম্পিউটাৰ বিজ্ঞানত তৃতীয় বৰ্ষত অধ্যয়ন কৰি আছিল। তথ্য পোৱাৰ পিছত, আৰক্ষী ঘটনাস্থলীত উপস্থিত হয় আৰু এই ঘটনাৰ উচিত তদন্ত আৰম্ভ কৰে। ছাত্ৰজনৰ পৰিয়ালৰ সদস্যসকলকো আৰক্ষীয়ে অৱগত কৰিছে আৰু গুৱাহাটী আহিবলৈ কৈছে। আৰক্ষীৰ মতে, ছাত্ৰজনে কিয় ইমান কঠোৰ পদক্ষেপ লৈছিল আৰু কি পৰিস্থিতিত এই কাণ্ড সংঘটিত কৰিলে এতিয়াও স্পষ্ট হোৱা নাই।
আৰক্ষীয়ে জনোৱা অনুসৰি, আইআইটি গুৱাহাটীৰ এইটো চতুৰ্থ আত্মহত্যাৰ ঘটনা। ইয়াৰ আগতে ৯ আগষ্টত এগৰাকী ছাত্ৰীৰ মৃতদেহ তাইৰ কোঠাত ওলমি থকা অৱস্থাত পোৱা গৈছিল। এই ঘটনাৰ পিছত, শিক্ষাৰ্থীসকলে প্ৰতিষ্ঠানটোৰ প্ৰশাসনিক ভৱনৰ বাহিৰত একত্ৰিত হৈছিল আৰু যথেষ্ট প্ৰদৰ্শন কৰিছিল।
পিছত, যেতিয়া বিষয়টো অনুসন্ধান কৰা হৈছিল, তেতিয়া গম পোৱা গৈছিল যে, শিক্ষাৰ্থীগৰাকী কোনো স্বাস্থ্যজনিত সমস্যাত ভুগি আছিল যাৰ বাবে অধ্যয়নত মনোনিবেশ কৰিবলৈ সক্ষম হোৱা নাছিল। এই বিষয়টোৰ ৰহস্য উদ্ভাৱন নহওঁতেই সোমবাৰে আন এগৰাকী শিক্ষাৰ্থীয়ে পুণৰ আত্মহত্যা কৰে।
এই ঘটনাৰ পাছতেই ছাত্ৰ-ছাত্ৰীসকলে এক হুলস্থূলীয়া পৰিবেশৰ সৃষ্টি কৰিছে। শিক্ষাৰ্থীসকলে অভিযোগ কৰে যে, এই ছাত্ৰগৰাকী মানসিকভাৱে বিচলিত হৈ আছিল। তেওঁ প্ৰতিষ্ঠানটোক নিজৰ মেডিকেল ৰিপোৰ্টো দিছিল, ইয়াৰ স্বত্বেও, প্ৰতিষ্ঠান পৰিচালনা সমিতিয়ে তেওঁক উপেক্ষা কৰিছিল। পিছত, প্ৰতিষ্ঠানটোৰ ডিনে শিক্ষাৰ্থীসকলৰ সৈতে বাৰ্তালাপ কৰে আৰু তেওঁলোকক আশ্বাস দিয়ে যে, এই প্ৰতিষ্ঠানটো ছাত্ৰ-ছাত্ৰীৰ কল্যাণ আৰু মানসিক স্বাস্থ্যসম্পৰ্কীয় উদ্বেগবোৰ সমাধান কৰিবলৈ প্ৰতিশ্ৰুতিবদ্ধ। ইয়াৰ বাবে, প্ৰতিটো স্তৰত প্ৰচেষ্টা কৰা হ’ব।
প্ৰতিষ্ঠানটোৰ মুখপাত্ৰৰ মতে, পৰিচালনা সমিতিকে ধৰি প্ৰতিষ্ঠানটোৰ সৈতে জড়িত সকলোৱে এই ঘটনাত গভীৰভাৱে দুখ প্ৰকাশ কৰে। এই সমস্যাবোৰ সমাধানৰ বাবে, শিক্ষাৰ্থীসকলৰ সৈতে কথা পাতিব আৰু এনে ঘটনা পুনৰ যাতে নঘটে তাৰ উচিত ব্যৱস্থা কৰা হ’ব বুলি জানিবলৈ দিয়ে। আনহাতে, আৰক্ষীয়ে জনোৱা মতে ছাত্ৰজনৰ পৰিয়ালক খবৰ দিয়াৰ লগতে তেওঁলোকক গুৱাহাটীলৈ মাতি অনা হৈছে। তেওঁলোকৰ আগমনৰ পিছত মৰণোত্তৰ পৰীক্ষা কৰা হ’ব। বৰ্তমান, আৰক্ষীয়ে এই বিষয়টো গুৰুত্বসহকাৰে তদন্ত কৰিবলৈ চেষ্টা কৰি আছে।
