বৰপেটাত এক শোকাবহ দুৰ্ঘটনা সংঘটিত হৈছে। হেলমেট নিপিন্ধাৰ বাবে ৬ বছৰীয়া শিশুক লাঠিৰে প্ৰহাৰ চিআৰপিএফ জোৱানৰ। জোৱানজনৰ এই কাণ্ডত এতিয়া জাঙুৰ খাই উঠিছে বৰপেটাৰ সচেতনমহলে।
বৰপেটাৰ নগাঁৱত সংঘটিত হৈছে এই নৃশংস ঘটনা। চি আৰ পি এফ জোৱানৰ প্ৰহাৰত আহত হোৱা কিশোৰজনৰ নাম শিৱাংশু নাথ। চি আৰ পি এফ জোৱানৰ নাম নুপুৰ দাস বুলি জানিব পৰা গৈছে।
আনহাতে, আহত শিশুটোক সংকটজনক অৱস্থাত বৰপেটাৰ ফখৰুদ্দিন আলি আহমেদ মেডিকেল কলেজত ভৰ্তি কৰা হৈছে।
ইফালে, এই ঘটনাক লৈ আৰক্ষী আৰু ৰাইজৰ মাজত তীব্ৰ বাকযুদ্ধ আৰম্ভ হৈছে। পৰিস্থিতি নিয়ন্ত্ৰণৰ বাবে ঘটনাস্থলীত শীৰ্ষ আৰক্ষী বিষয়া উপস্থিত হৈছে।
জানিব পৰা মতে, সৰ্থেবাৰীৰ পৰা দুচকীয়া বাহনেৰে মাতৃৰ সৈতে ঘৰলৈ উভতি আহিছিল শিশুটোৱে।
প্ৰথম অৱস্থাত হেলমেট পৰিধান নকৰাৰ বাবে বাহনখন ৰখাবলৈ চি আৰ পি এফৰ জোৱানে চালকক টাৰ্গেট কৰি লাঠিৰে কোবাইছিল। কিন্তু লাঠিৰ কোবটো পৰিল ৫ বছৰীয়া শিশুৰ মুৰত।
এই ঘটনাৰ পিছতে বৰ্তমান স্থানীয় ৰাইজে জবাৱদিহি কৰিছে চিআৰপিএফ জোৱানজনক।
