আজি আহমেদাবাদৰ নৰেন্দ্ৰ মোদী ষ্টেডিয়ামত ভাৰত আৰু নিউজিলেণ্ডৰ মাজত অনুষ্ঠিত হ’ব টি-২০ বিশ্বকাপ ২০২৬ৰ ফাইনেল। হোয়াইট বল ফৰ্মেটত একেৰাহে দ্বিতীয়বাৰৰ বাবে ফাইনেলত মুখামুখি হ’ব ভাৰত আৰু নিউজিলেণ্ড।
ইতিহাস সৃষ্টিৰ উদ্দেশ্যেৰে কিউইৰ বিৰুদ্ধে খেলপথাৰত প্ৰৱেশ কৰিব টিম ইণ্ডিয়াই। আজিলৈকে কোনো আয়োজক দলে খিতাপ জয় কৰিব পৰা নাই, কোনো দলেই একেৰাহে দুবাৰকৈ ট্ৰফী দখল কৰিবলৈ সক্ষম হোৱা নাই। সূৰ্যকুমাৰ যাদৱৰ নেতৃত্বত এই কৃতিত্ব অৰ্জন কৰিবলৈ এখোজ দূৰত টীম ইণ্ডিয়া। ইফালে দ্বিতীয়বাৰৰ বাবে ফাইনেলত প্ৰৱেশ কৰা কিউই দলটোৱে প্ৰথমটো খিতাপ দখলৰ বাবে নিজৰ লক্ষ্য স্থিৰ ৰাখিছে।এনে পৰিস্থিতিত আহমেদাবাদৰ বিশ্বৰ সৰ্ববৃহৎ ষ্টেডিয়ামত দুয়োটা দলৰ মাজত ঘনিষ্ঠ প্ৰতিদ্বন্দ্বিতা দেখা যাব।
এই পৰ্যন্ত ভাৰত আৰু নিউজিলেণ্ডৰ মাজত মুঠ ৩০ খন টি-২০ মেচ অনুষ্ঠিত হৈছে। ইয়াৰে ১৮খন খেলত ভাৰতে জয়লাভ কৰাৰ বিপৰীতে নিউজিলেণ্ডে ১১খনত জয়লাভ কৰিছে।টি-২০ বিশ্বকাপৰ ঠিক আগতে ভাৰতত দুয়োটা দলৰ মাজত পাঁচখন মেচৰ শৃংখলা অনুষ্ঠিত হৈছিল, য’ত ভাৰতীয় দলটোৱে ৪-১ত জয়লাভ কৰিছিল।
টি-২০ মেচৰ যিখন খেলপথাৰত ভাৰত আৰু নিউজিলেণ্ডৰ মাজত অনুষ্ঠিত হ’ব চূড়ান্ত খেলখন ৰঙা আৰু ক’লা মাটিৰ মিশ্ৰণেৰে তৈয়াৰ কৰা হৈছে। এই খেলপথাৰখনেই আছিল যোৱা বছৰৰ আই পি এলৰ ফাইনেলৰ স্থান। এই খেলপথাৰত খেলা আঠখন খেলৰ ভিতৰত পাঁচখন খেলত চেজিং দলটোৱে জয়লাভ কৰিছে। ইয়াৰ পূৰ্বে বিশ্বকাপৰ ছুপাৰ ৮ ৰাউণ্ডত দক্ষিণ আফ্ৰিকাৰ হাতত পৰাস্ত হৈছিল ভাৰতীয় দলটো। যিখন খেলপথাৰত ভাৰতে ১৮৮ ৰানৰ লক্ষ্য খেদিবলৈ ব্যৰ্থ হৈছিল, সেইখন পিটচ ক’লা মাটিৰে নিৰ্মাণ কৰা হৈছিল। এই একেখন খেলপথাৰতে ২০২৩ চনৰ এদিনীয়া বিশ্বকাপৰ ফাইনেলত অষ্ট্ৰেলিয়াৰ হাতত পৰাস্ত হৈছিল টীম ইণ্ডিয়া। এইবাৰ খিতাপৰ যুঁজখন ক’লা মাটিৰে নিৰ্মিত খেলপথাৰত নহয়, যি টীম ইণ্ডিয়াৰ বাবে কিছু সকাহ হৈ পৰিছে। গতিকে আজি সন্ধিয়া ৭ বজাত আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’বলগীয়া খেলখন অতি ৰোমাঞ্চকৰ হব বুলি সকলোৱে আশা কৰিছে।
