ডুবাইত অনুষ্ঠিত হ’বলগীয়া ভাৰত আৰু পাকিস্তানৰ মাজৰ মেচখনৰ বাবে অনুৰাগীৰ মাজত উন্মাদনা তুংগত উঠিছে। ভাৰত-পাকিস্তানৰ খেলখন উপভোগ কৰিবলৈ পৰিকল্পনা কৰি থকা অনুৰাগীসকলৰ বাবে এই বাতৰি নিৰাশাজনক। কিয়নো মেচখনৰ বাবে টিকট মুকলি হোৱাৰ কিছু মিনিটৰ ভিতৰতে সকলো টিকট বিক্ৰী হৈ গৈছে।
১৯ ফেব্ৰুৱাৰীৰ পৰা আৰম্ভ হ’বলগীয়া চেম্পিয়নছ ট্ৰফীৰ গ্ৰুপ পৰ্যায়ৰ মেচত ২৩ ফেব্ৰুৱাৰীত পাকিস্তানৰ মুখামুখি হ’ব ভাৰত।
উল্লেখ্য যে, ভাৰতে চেম্পিয়নছ ট্ৰফীৰ আটাইকেইখন মেচ ডুবাইত খেলিব। সেয়ে অনুৰাগীৰ মাজত টিকটক লৈ যথেষ্ট উৎকণ্ঠা দেখা পোৱা গৈছে। ভাৰত আৰু পাকিস্তানৰ মাজত হ’বলগীয়া মেচখনৰ বাবে ইতিমধ্যেই প্ৰায় সকলোবোৰ টিকট শেষ হৈছে।
সোমবাৰৰ পৰা ভাৰতীয় সময় অনুসৰি বিয়লি ৫.৩০ বজাৰ পৰা ভাৰতৰ খেলৰ টিকট বিক্ৰী আৰম্ভ হয়। ডুবাই ক্ৰিকেট ষ্টেডিয়ামৰ জেনেৰেল ষ্টেণ্ডৰ টিকটৰ মূল্য প্ৰায় ৩,০০০ টকাৰ পৰা আৰম্ভ হয়।
ডুবাইত অনুষ্ঠিত হ’বলগীয়া প্ৰথমখন ছেমি ফাইনেল মেচৰ পিছত আইচিচি চেম্পিয়নছ ট্ৰফীৰ চূড়ান্ত খেলখনৰ টিকট প্ৰদান কৰা হ’ব।
