পেহেলগাম সন্ত্ৰাসবাদী আক্ৰমণক লৈ আপত্তিজনক মন্তব্য কৰা শ্বাহিদ আফ্ৰিদীৰ ইউটিউব চেনেল ভাৰতত নিষিদ্ধ ঘোষণা কৰা হৈছে। এতিয়া ভাৰতৰ কোনো লোকে চাব নোৱাৰিব পাকিস্তানৰ প্ৰাক্তন অধিনায়ক শ্বাহিদ আফ্ৰিদীৰ ইউটিউব চেনেল। ইয়াৰ পূৰ্বে ভাৰত চৰকাৰে আন বহু পাকিস্তানী ক্ৰিকেটাৰৰ বিৰুদ্ধে এইধৰণৰ কঠোৰ ব্যৱস্থা গ্ৰহণ কৰিছে।
উল্লেখ্য যে শ্বাহিদ আফ্ৰিদীৰ পূৰ্বে ভাৰতত শ্বোৱেইব আখতাৰ, ৰছিদ লতিফ, তনবীৰ আহমেদৰ দৰে কিংবদন্তি ক্ৰিকেটাৰৰ ইউটিউব চেনেল নিষিদ্ধ কৰা হৈছিল। পেহেলগাম সন্ত্ৰাসবাদী আক্ৰমণৰ পিছতে ভাৰত চৰকাৰে এই ব্যৱস্থা গ্ৰহণ কৰিছে।
জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণ সন্দৰ্ভত শ্বাহিদ আফ্ৰিদীয়ে বিৰূপ মন্তব্য প্ৰদান কৰিছিল। আফ্ৰিদীয়ে কৈছিল, ‘এই বিষয়ত কোনো ৰাজনীতি হ’ব নালাগে বুলি মোৰ বিশ্বাস। ভাৰতত আক্ৰমণ সংঘটিত হোৱাৰ লগে লগে পোনপটীয়াকৈ পাকিস্তানৰ নাম প্ৰকাশ কৰা হয়। আনহাতে ভাৰতে প্ৰমাণ লৈ আগবাঢ়ি আহিব লাগে আৰু তাৰ পিছত বিশ্ববাসীক জনাব লাগে। কোনো ধৰ্মই সন্ত্ৰাসবাদক সমৰ্থন নকৰে।’
আফ্ৰিদীয়ে আৰু কয় যে ভাৰতত যি ঘটিল সেয়া অতি দুৰ্ভাগ্যজনক। পাকিস্তানত যি হৈ আহিছে সেয়াও আক্ষেপৰ বিষয়, এনে হ’ব নালাগে। মোৰ বিশ্বাস চুবুৰীয়া দেশসমূহে ইজনে সিজনৰ লগত ভালকৈ জীয়াই থাকিব লাগে আৰু কাজিয়া এৰাই চলিব লাগে।
পূৰ্বতে কৰা এই মন্তব্যৰ পিছত আফ্ৰিদীয়ে পুনৰ আপত্তিজনক মন্তব্য আগবঢ়াইছে। এইবাৰ তেওঁ কয় যে মই আচৰিত হৈছো যে আক্ৰমণৰ এঘণ্টাৰ ভিতৰতে তেওঁলোকৰ মিডিয়া বলীউডত পৰিণত হ’ল। ভগৱানৰ স্বাৰ্থত সকলো বলীউড কৰি নেপেলাব। ভাৰতত ফটকা বিস্ফোৰণ হ’লেও এয়া পাকিস্তানে কৰা বুলি কয়। কাস্মীৰত আপোনালোকৰ ৮ লাখ সেনা থকাৰ পিছতো এনেকুৱাই হ’ল। অৰ্থাৎ আপোনালোক নিষ্কৰ্মা আৰু অসাৰ যে জনসাধাৰণক নিৰাপত্তা দিব নোৱাৰে।
উল্লেখ্য যে, ২২ এপ্ৰিলত জম্মু-কাশ্মীৰৰ পেহেলগামত সংঘটিত হৈছিল এক ভয়ংকৰ সন্ত্ৰাসবাদী আক্ৰমণ। এই আক্ৰমণত ২৬ জন নিৰীহ লোকে প্ৰাণ হেৰুৱাইছিল। এই আক্ৰমণৰ পিছতে ক্ষোভিত হৈ থকা ভাৰত চৰকাৰে পাকিস্তান সন্দৰ্ভত বহু কঠোৰ সিদ্ধান্ত গ্ৰহণ কৰে।
