আই পি এল ২০২৫ত ছানৰাইজাৰ্ছ হায়দৰাবাদৰ প্ৰদৰ্শন হতাশাজনক। যোৱাবাৰ এই দলটোৱে ফাইনেলত প্ৰৱেশ কৰিছিল যদিও এইবাৰ ১০খন মেচৰ ভিতৰত মাত্ৰ ৩খন খেলত জয়লাভ কৰি নৱম স্থানত আছে। ৭খন মেচত পৰাজয়ৰ সন্মুখীন হ’বলগীয়া হয়।
পিছে এতিয়া ছানৰাইজাৰ্ছৰ স্বত্বাধিকাৰী কাব্যা মাৰান বহু বাতৰিৰ শীৰ্ষত আছে। প্ৰতি মুহূৰ্ততে সলনি হৈ থকা তেওঁৰ প্ৰতিক্ৰিয়া ছ’চিয়েল মিডিয়াত ভাইৰেলো হৈ আছে।
১৯৯২ চনৰ ৬ আগষ্টত চেন্নাইত জন্মগ্ৰহণ কৰা কাব্যা মাৰান অতি প্ৰভাৱশালী। এই পৰিয়ালটোৰ ব্যৱসায় যথেষ্ট ডাঙৰ। কাব্যাৰ পিতৃ কালানিথি মাৰান ছান গ্ৰুপৰ অধ্যক্ষ আৰু পৰিচালন সঞ্চালক। ফ’ৰ্বছৰ তথ্য অনুসৰি, ভাৰতৰ অন্যতম বৃহৎ মিডিয়া গ্ৰুপ হৈছে ছান গ্ৰুপ।
কাব্যাৰ মাতৃ কাবেৰী মাৰান ছান টিভি নেটৱৰ্কৰ চিইঅ’ হিচাপে কাৰ্যনিৰ্বাহ কৰি আছে। ব্যৱসায়ৰ উপৰিও পৰিয়ালটোৰ ৰাজনৈতিক উপস্থিতিও শক্তিশালী। কাব্যাৰ ককাক দয়ানিধি মাৰান দ্ৰাবিড় মুনেত্ৰ কাঝাগম (ডি এম কে) দলৰ সক্ৰিয় নেতা।
কাব্যা মাৰানে চেন্নাইৰ ষ্টেলা মাৰিছ কলেজৰ পৰা স্নাতক ডিগ্ৰী লাভ কৰাৰ পিছত ব্ৰিটেইনৰ ৱাৰউইক বিজনেছ স্কুলৰ পৰা এম বি এ সম্পূৰ্ণ কৰে। তেওঁৰ শিক্ষাই তেওঁক ব্যৱসায়িক নেতৃত্বৰ বাবে প্ৰস্তুত কৰাত গুৰুত্বপূৰ্ণ ভূমিকা পালন কৰিছে। ২০১৮ চনত ছানৰাইজাৰ্ছৰ দায়িত্ব লোৱাৰ পিছৰে পৰা তেওঁ ইয়াৰ সিদ্ধান্ত গ্ৰহণ প্ৰক্ৰিয়া, নিলাম কৌশল আৰু সামগ্ৰিক দল পৰিচালনাৰ সৈতে সক্ৰিয়ভাৱে জড়িত হৈ আছে।
খবৰ অনুসৰি কাব্যা মাৰানৰ ব্যক্তিগত সম্পত্তিৰ পৰিমাণ প্ৰায় ৪০৯ কোটি টকা বুলি অনুমান কৰা হৈছে। মাৰান পৰিয়ালৰ সামূহিক সম্পদ ১৯ হাজাৰ কোটি টকা। অৱশ্যে ছানৰাইজাৰ্ছ হায়দৰাবাদত তেওঁৰ সঠিক মালিকীস্বত্বৰ অংশীদাৰিত্ব জানিব পৰা হোৱা নাই। ডেকান চাৰ্জাৰ্ছৰ অৱসানৰ পিছত ২০১২ চনত প্ৰতি বছৰে ৮৫.০৫ কোটি টকাত ক্ৰয় কৰা এই ফ্ৰেঞ্চাইজিটো ছান টিভি নেটৱৰ্কৰ মালিক।
