ভাৰতীয় ক্ৰিকেট নিয়ন্ত্ৰণ ব’ৰ্ডে সলনি কৰিলে আই পি এলৰ এখন খেলৰ সূচী। অহা ৬ এপ্ৰিলত কলকাতা নাইট ৰাইডাৰ্ছ আৰু লক্ষ্ণৌ ছুপাৰ জায়েন্টছৰ মাজত অনুষ্ঠিত হোৱা লীগৰ ১৯ সংখ্যক মেচখন নিৰাপত্তাজনিত কাৰণত বিচিচিআইয়ে সালসলনি কৰিছে।
আই পি এলৰ প্ৰেছ বিজ্ঞপ্তি অনুসৰি এতিয়া এই মেচখন অহা ৮ এপ্ৰিলত অনুষ্ঠিত হ’ব।
আই পি এলৰ এক প্ৰেছ বিজ্ঞপ্তি অনুসৰি কলকাতা আৰক্ষীয়ে বংগ ক্ৰিকেট সন্থাৰ ওচৰত অনুৰোধ জনোৱাৰ পিছতে ব’ৰ্ডে এই সিদ্ধান্ত গ্ৰহণ কৰিছে। উৎসৱৰ বাবে সমগ্ৰ মহানগৰীত অতিৰিক্তভাৱে নিৰাপত্তাৰক্ষী নিয়োগ কৰা হ’ব যাৰ বাবে ৮ এপ্ৰিলত খেলখন স্থানান্তৰ কৰিবলৈ বিষয়াসকলে অনুৰোধ জনাইছিল।
ইয়াৰ বাহিৰে বাকী খেলৰ সময়সূচীত কোনো পৰিৱৰ্তন কৰা হোৱা নাই। এতিয়া এই খেলখন অহা ৮ এপ্ৰিলৰ বিয়লি ৩:৩০ বজাত অনুষ্ঠিত হ’ব।
নতুন সংশোধনী অনুসৰি এতিয়া ৬ এপ্ৰিল অৰ্থাত দেওবাৰে মাত্ৰ এখন মেচহে হ’ব। ইয়াৰ পূৰ্বে এই দিনটোত দুখন মেচ অনুষ্ঠিত হ’বলগীয়া আছিল। এতিয়া ৬ এপ্ৰিলত ছানৰাইজাৰ্ছ হায়দৰাবাদে সন্ধিয়া ৭:৩০ বজাৰ পৰা গুজৰাট টাইটানছৰ বিৰুদ্ধে খেলিব।
আনহাতে অহা ৮ এপ্ৰিল অৰ্থাত মঙলবাৰে ডাবল হেডাৰ মেচ অনুষ্ঠিত হ’ব, য’ত বিয়লি লক্ষ্ণৌই কলকাতাৰ বিৰুদ্ধে খেলিব, তাৰ পিছত সূচী অনুসৰি চণ্ডীগড়ত অনুষ্ঠিত হ’বলগীয়া সন্ধিয়াৰ খেলখনত পঞ্জাৱ কিংছে চেন্নাই ছুপাৰ কিংছৰ বিৰুদ্ধে খেলিব।
