ইৰাণৰ ওপৰত আমেৰিকা আৰু ইজৰাইলৰ আক্ৰমণৰ পিছত যুদ্ধক্ষেত্ৰত পৰিণত হৈছে মধ্যপ্ৰাচ্য। ইৰাণৰ সৰ্বোচ্চ নেতা আয়াতুল্লাহ আলী খামেনেইৰ মৃত্যুৰ পিছত এতিয়া আমেৰিকাই ইৰাণৰ নৌসেনাক লক্ষ্য কৰি লৈছে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰকাশ কৰিছে যে, আমেৰিকাৰ সেনা বাহিনীয়ে ইৰাণৰ নৌসেনাৰ ৯খন জাহাজ ধ্বংস কৰি ডুবাই পেলাইছে। তেওঁ লগতে কয় যে, ইৰাণৰ বাকী থকা জাহাজসমূহ অতি সোনকালে ধ্বংস কৰা হ’ব।
ইফালে ইৰাণৰ চৰকাৰী সংবাদ সংস্থাই দাবী কৰিছিল যে ইৰাণৰ সেনাই অপাৰেচন ট্ৰু প্ৰমিজ ৪ৰ অংশ হিচাপে আমেৰিকাৰ বিমানবাহী জাহাজ আব্ৰাহাম লিংকনত ক্ষেপণাস্ত্ৰ আক্ৰমণ চলাইছিল।কিন্তু আমেৰিকাৰ কেন্দ্ৰীয় কমাণ্ডে এই দাবী নাকচ কৰি কয় যে, লিংকনৰ ওপৰত কোনো আক্ৰমণ সফল হোৱা নাই।
আমেৰিকাৰ ৰাষ্ট্ৰপতি ট্ৰাম্পে ১ মাৰ্চত দাবী কৰিছিল যে, ইৰাণৰ বিৰুদ্ধে চলি থকা অভিযানত এতিয়ালৈকে ইৰাণৰ ৪৮জন শীৰ্ষ নেতা আৰু সামৰিক বিষয়া নিহত হৈছে। ট্ৰাম্পে কয় যে, আমেৰিকাই এবাৰতে ৪৮ জন ইৰাণী নেতাক নিৰ্মূল কৰিছে আৰু এই অভিযান অতি দ্ৰুতগতিত আগবাঢ়িছে।
আয়াতুল্লাহ আলী খামেনেইৰ মৃত্যুত পিছত অনিশ্চয়তাত ডুব গৈছে ইৰাণ। আমেৰিকাৰ সাংসদ আৰু ইৰাণৰ বিষয়াসকলৰ বক্তব্যই তেহৰাণৰ ক্ষমতা গাঁথনিৰ ওপৰত কি হ’ব সেই সম্পৰ্কে গভীৰ বিভ্ৰান্তিৰ কথা স্পষ্টভাৱে সূচায়। এক সাক্ষাৎকাৰত আমেৰিকাৰ চেনেটৰ চোৰাংচোৱা সমিতিৰ অধ্যক্ষ টম কটনে কয় যে, সামৰিক অভিযান অব্যাহত থাকিব। তেওঁ কয় যে অনাগত দিনত আমেৰিকাৰ জনসাধাৰণে ইৰাণৰ ক্ষেপণাস্ত্ৰ, ইয়াৰ লঞ্চাৰ আৰু তেওঁলোকৰ ক্ষেপণাস্ত্ৰ নিৰ্মাণ ক্ষমতাৰ বিৰুদ্ধে পদ্ধতিগত আৰু সুপৰিকল্পিত ব্যৱস্থা গ্ৰহণৰ সাক্ষী হ’ব।
ৱাশ্বিংটনে সামৰিক হেঁচা অব্যাহত থকাৰ ইংগিত দিয়াৰ বিপৰীতে তেহৰানে এই আক্ৰমণসমূহক অবৈধ আগ্ৰাসন বুলি অভিহিত কৰিছে। এই বিৰোধী বক্তব্যসমূহে স্পষ্টভাৱে ইংগিত দিয়ে যে ইৰাণৰ নেতৃত্বৰ পৰিৱৰ্তন প্ৰক্ৰিয়াই কি দিশ ল’ব সেই সম্পৰ্কে যথেষ্ট অনিশ্চয়তা অব্যাহত আছে।
