ভাৰতীয় বায়ু সেনা আৰু সীমান্ত সুৰক্ষা বাহিনীৰ সৈতে জড়িত কেতবোৰ গুৰুত্বপূৰ্ণ তথ্য পাকিস্তানী এজেণ্টক যোগান ধৰাৰ গুৰুতৰ অভিযোগত গুজৰাটৰ পৰা এজন লোকক গ্ৰেপ্তাৰ কৰা হৈছে। গুজৰাট আৰক্ষীৰ এণ্টি টেৰ’ৰিষ্ট স্কোৱাডে (এ টি এছ) গ্ৰেপ্তাৰ কৰা লোকজনক সহদেৱ সিং গোহিল বুলি চিনাক্ত কৰা হৈছে।
এ টি এছৰ এগৰাকী জ্যেষ্ঠ বিষয়াই জানিব দিয়া অনুসৰি, গুজৰাটৰ কচ্চৰ নিবাসী গোহিলে এগৰাকী স্বাস্থ্য কৰ্মী হিচাপে কৰ্মৰত। হোৱাটছএপৰ জৰিয়তে ২০২৩ চনত এগৰাকী পাকিস্তানী এজেণ্টৰ সম্পৰ্কত আহিছিল গোহিল।
পাকিস্তানী মহিলাগৰাকীয়ে নিজকে অদিতি ভৰদ্বাজ বুলি পৰিচয় দিছিল। গোহিলে ভাৰতীয় বায়ু সেনা আৰু বি এছ এফৰ কেইবাটাও নিৰ্মাণাধীন এলেকাৰ ফটো আৰু ভিডিঅ’ পাকিস্তানী মহিলাগৰাকীলৈ প্ৰেৰণ কৰা বুলিও জানিব দিয়ে এ টি এছৰ শীৰ্ষ বিষয়াগৰাকীয়ে।
বিষয়াগৰাকীয়ে আৰু কয়, ‘আমি তথ্য লাভ কৰিছিলো যে তেওঁ পাকিস্তানী এজেণ্টৰ সৈতে বিএছএফ আৰু আইএএফৰ সৈতে জড়িত তথ্য যোগান ধৰি আছে। ইয়াৰ পিছত ১ মে’ত গোহিলক প্ৰাৰম্ভিক তদন্তৰ বাবে মাতি অনা হয়, য’ত এছটিএফে জানিব পাৰে যে পাকিস্তানী এজেণ্টজনে তেওঁৰ পৰা আইএএফ আৰু বিএছএফৰ সৈতে জড়িত ফটো আৰু ভিডিঅ’ বিচাৰিছে।’
ইয়াৰ উপৰি গোহিলে এগৰাকী অজ্ঞাত ব্যক্তিৰ পৰা ৪০ হাজাৰ টকা লাভ কৰা বুলিও তদন্তকাৰী বিষয়াগৰাকীয়ে জানিব দিয়ে।
