দেওবাৰে ইজৰাইলে য়েমেনৰ ৰাজধানী ছানাত প্ৰচণ্ড বিমান আক্ৰমণ চলাই ৬ জন নিহত আৰু ৮৬ জন আহত হয়। এই আক্ৰমণৰ সময়ত ছানাৰ বহু আৱাসিক এলেকাত বিস্ফোৰণৰ শব্দ শুনা যায়।
ইজৰাইলৰ সেনাই কয় যে, এই বিমান আক্ৰমণত কেইবাটাও স্থান লক্ষ্য কৰি লোৱা হৈছে, য’ত আছে এটা বিদ্যুৎ কেন্দ্ৰ আৰু এটা গেছ ষ্টেচন। ইজৰাইলৰ ওপৰত হাউথী বিদ্ৰোহীৰ আক্ৰমণৰ প্ৰতিক্ৰিয়া স্বৰূপে এই আক্ৰমণ সংঘটিত হৈছে।
বিমান আক্ৰমণৰ পিছত ইজৰাইলৰ সেনাই এক বিবৃতি প্ৰকাশ কৰি কয় যে, বিগত সপ্তাহত ইজৰাইলৰ জনসাধাৰণৰ বিৰুদ্ধে ছাৰ্ফেচ টু ছাৰ্ফেচ মিছাইল আৰু ইউএভি (ড্ৰ’ন)কে ধৰি হাউথী সন্ত্ৰাসবাদীয়ে ইজৰাইল আৰু ইয়াৰ নাগৰিকৰ ওপৰত বাৰে বাৰে আক্ৰমণৰ প্ৰতিক্ৰিয়া স্বৰূপে এই আক্ৰমণ সংঘটিত কৰিছে।
হুথী স্বাস্থ্য মন্ত্ৰালয়ৰ এগৰাকী মুখপাত্ৰই কয় যে, ইজৰাইলৰ আক্ৰমণত ৬ জন লোক নিহত হোৱাৰ লগতে ৮৬ জন আহত হৈছে। আহতসকলক চিকিৎসাৰ বাবে চিকিৎসালয়ত ভৰ্তি কৰোৱা হৈছে।
ইয়াৰ পূৰ্বে শুকুৰবাৰে হাউথী বিদ্ৰোহীয়ে ইজৰাইলৰ ফালে বেলিষ্টিক মিছাইল নিক্ষেপ কৰা বুলি দাবী কৰিছিল। গাজাত পেলেষ্টাইনীসকলৰ সমৰ্থনত এই আক্ৰমণ সংঘটিত হৈছিল।
