শুল্ক যুদ্ধৰ বাবে ভাৰত আৰু আমেৰিকাৰ সম্পৰ্ক উত্তেজনাপূৰ্ণ পৰ্যায়ৰ মাজেৰে পাৰ হৈছে। দুয়োখন দেশৰ মাজত অবিশ্বাসৰ গভীৰ খাদ গঢ় লৈ উঠিছে। পৰিৱৰ্তিত পৰিস্থিতিৰ বাবে বিশেষজ্ঞসকলৰ মতামত বিভক্ত।
বহুতে বিশ্বাস কৰে যে, প্ৰধানমন্ত্ৰী নৰেন্দ্ৰ মোদীৰ কঠোৰ স্থিতিয়ে ট্ৰাম্পক আচৰিত কৰি তুলিছে। একে সময়তে জাকি শ্বালমে ইজৰাইলৰ জেৰুজালেম পোষ্ট কাকতত লিখিছে যে ইজৰাইলৰ প্ৰধানমন্ত্ৰী বেঞ্জামিন নেতান্যায়াহুৱে প্ৰধানমন্ত্ৰী মোদীৰ পৰা শিকিব লাগে।
ইজৰাইলৰ প্ৰতিৰক্ষা নীতি বিশেষজ্ঞ জাকি শ্বালমে কয় যে, ইজৰাইলে ভাৰতৰ পৰা শিকিব লাগে যে কেনেকৈ ‘ৰাষ্ট্ৰীয় সন্মান’ক ‘কৌশলগত সম্পদ’ হিচাপে গঢ়ি তুলিব পাৰি। মিছগাভ ইনষ্টিটিউট ফৰ নেশ্যনেল ছিকিউৰিটি এণ্ড জায়নিষ্ট ষ্ট্ৰেটেজিৰ জ্যেষ্ঠ ফেলো শ্বালমে জেৰুজালেম পোষ্টত লিখিছে যে, শুল্ক নীতিৰ ক্ষেত্ৰত আমেৰিকাৰ প্ৰতি প্ৰধানমন্ত্ৰী মোদীৰ কঠোৰ স্থিতি আৰু পাকিস্তানৰ সৈতে সীমান্ত সংঘৰ্ষৰ প্ৰতি তেওঁৰ মনোভাৱেই দেখুৱাইছে যে জাতীয় সন্মান বিলাসীতা নহয়, বৰঞ্চ দীৰ্ঘম্যাদী কৌশলগত সম্পদহে।
শুল্ক নীতিৰ সন্দৰ্ভত আমেৰিকা প্ৰশাসনৰ বিতৰ্কিত স্থিতি, ৰাছিয়াৰ সৈতে ভাৰতৰ ঘনিষ্ঠ সম্পৰ্ক আৰু মে’ মাহত পাকিস্তানৰ সৈতে সংঘাতৰ ফলত যোৱা কেইমাহমানত আমেৰিকা-ভাৰতৰ সম্পৰ্ক আস্থাৰ সংকটৰ মাজত ডুব গৈছে। ভাৰতে বিশ্বৰ ভিতৰতে সৰ্বাধিক শুল্ক আৰোপ কৰে বুলি দাবী কৰি আমেৰিকাৰ আমদানিৰ ওপৰত ভাৰতে আৰোপ কৰা উচ্চ শুল্কক লৈ ট্ৰাম্পে বাৰে বাৰে অসন্তুষ্টি প্ৰকাশ কৰি আহিছে।
