আন এক বিৰল কৃতিত্বৰ অধিকাৰী হ’ল যশপ্ৰীত বুমৰাহ। টেষ্ট ৰেংকিঙত তেওঁ ভংগ কৰিছে এক বিশেষ অভিলেখ। টেষ্ট ৰেংকিঙৰ এক বিশেষ ক্ষেত্ৰত বুমৰাহে ৰবিচন্দ্ৰন অশ্বিনক অতিক্ৰম কৰিবলৈ সক্ষম হৈছে।
সৰ্বাধিক ৰেটিং পইণ্ট পোৱা ভাৰতীয় বলাৰ হিচাপে পৰিগণিত হৈছে বুমৰাহ। সম্প্ৰতি টেষ্ট বলিং ৰেংকিঙত বুমৰাহ শীৰ্ষ স্থানত আছে। তেওঁ লাভ কৰিছে ৯০৭ ৰেটিং পইণ্ট। ইফালে টেষ্ট বলিং ৰেংকিঙত এটা স্থান অৱনমিত হৈছে ৰবীন্দ্ৰ জাদেজা।
অষ্ট্ৰেলিয়াৰ বিৰুদ্ধে মেলব’ৰ্ন টেষ্টত বুমৰাহে চমকপ্ৰদ প্ৰদৰ্শন আগবঢ়াই মুঠ ৯টা উইকেট দখল কৰে। অৱশ্যে এই মেচখনত জয়ী হ’ব নোৱাৰিলে টিম ইণ্ডিয়াই। অষ্ট্ৰেলিয়াই ১৮৪ ৰানত পৰাস্ত কৰে ভাৰতক। মেচখনত পৰাস্ত হ’লেও বুমৰাহৰ প্ৰদৰ্শন আছিল ভাল। এই প্ৰদৰ্শনৰ ভিত্তিতে বুমৰাহে ৰেংকিঙৰ শীৰ্ষ স্থানত অধিষ্ঠিত হয়।
ইয়াৰ লগতে তেওঁৰ ৰেটিং পইণ্টো বৃদ্ধি পাইছে। ভাৰতৰ শীৰ্ষ ৫ ৰ ভিতৰত একমাত্ৰ বলাৰ বুমৰাহ। শীৰ্ষ ১০ ৰ ভিতৰত অন্তৰ্ভুক্ত হৈছে জাদেজা। তেওঁ দশম স্থানত আছে।
অশ্বিনৰ অভিলেখ ভংগ কৰিলে বুমৰাহে –
উল্লেখ্য যে, টেষ্টত সৰ্বাধিক ৰেটিং পইণ্ট লাভ কৰাৰ ক্ষেত্ৰত বুমৰাহে ভংগ কৰিলে অশ্বিনৰ অভিলেখ। বুমৰাহে লাভ কৰিছে ৯০৭ ৰেটিং পইণ্ট। ইয়াৰ লগে লগে তেওঁ সৰ্বাধিক ৰেটিং পইণ্ট পোৱা ভাৰতীয় বলাৰ হিচাপে পৰিগণিত হৈছে। এই ক্ষেত্ৰত তেওঁ অশ্বিনক অতিক্ৰম কৰিছে। অশ্বিনৰ শ্ৰেষ্ঠ ৰেটিং পইণ্ট আছিল ৯০৪।
