২৭ জানুৱাৰী অৰ্থাত সোমবাৰে ২০২৪ বৰ্ষৰ শ্ৰেষ্ঠ টেষ্ট ক্ৰিকেটাৰ হিচাপে নিৰ্বাচিত হোৱা যশপ্ৰীত বুমৰাহে আজি লাভ কৰিলে আন এক সন্মান। ‘আইচিচি পুৰুষ ক্ৰিকেটাৰ অৱ দ্যা ইয়েৰ’ হিচাপে নিৰ্বাচিত কৰা হৈছে সাম্প্ৰতিক সময়ৰ শ্ৰেষ্ঠ বেগী বলাৰ বুমৰাহক।
৩১ বছৰীয়া বেগী বলাৰগৰাকীয়ে ইংলেণ্ড আৰু বাংলাদেশৰ বিৰুদ্ধে ঘৰুৱা টেষ্ট শৃংখলাত ভাৰতৰ সফলতাত যথেষ্ট অৰিহণা আগবঢ়াইছিল। কেৱল এয়াই নহয়, দ্বিতীয়বাৰৰ বাবে দেশক টি-২০ চেম্পিয়ন কৰোৱাৰ ক্ষেত্ৰতো তেওঁ গুৰুত্বপূৰ্ণ ভূমিকা পালন কৰিছিল। যাৰ বাবে তেওঁ ‘আইচিচিৰ বছৰৰ শ্ৰেষ্ঠ ক্ৰিকেটাৰ বঁটা’ লাভ কৰিবলৈ সক্ষম হয়।
আপুনি জানি আচৰিত হ’ব যে সন্মানীয় ছাৰ গাৰ্ফিল্ড ছ’বাৰ্ছ বঁটাৰ বাবে (আইচিচিৰ বৰ্ষশ্ৰেষ্ঠ পুৰুষ ক্ৰিকেটাৰ বঁটাৰ বাবে) বুমৰাহৰ সৈতে তালিকাত আছিল অষ্ট্ৰেলিয়াৰ তাৰকা বেটছমেন ট্ৰেভিছ হেডৰ লগতে ইংৰাজ বেটছমেন জো ৰুট আৰু হেৰী ব্ৰুক। কিন্তু আটাইকেইগৰাকী তাৰকা ক্ৰিকেটাৰকে পিছ পেলাই তেওঁ এই সন্মানীয় বঁটাটো লাভ কৰিবলৈ সক্ষম হৈছে।
উল্লেখ্য যে, এই পৰ্যন্ত পাঁচগৰাকী ভাৰতীয় ক্ৰিকেটাৰে লাভ কৰিছে এই সন্মানীয় বঁটা। বুমৰাহৰ পূৰ্বে ৰাহুল দ্ৰাবিড়, শচীন তেণ্ডুলকাৰ, ৰবিচন্দ্ৰন অশ্বিন আৰু বিৰাট কোহলীয়ে এই বঁটা লাভ কৰিছিল।
কোন ভাৰতীয় ক্ৰিকেটাৰে কিমান চনত লাভ কৰিছিল এই বঁটা
ৰাহুল দ্ৰাবিড়- ২০০৪
শচীন তেণ্ডুলকাৰ- ২০১০
ৰবিচন্দ্ৰন অশ্বিন- ২০১৬
বিৰাট কোহলী- ২০১৭ আৰু ২০১৮
জশপ্ৰীত বুমৰাহ- ২০২৪
