দক্ষিণ আফ্ৰিকাৰ বেগী বলাৰ কাগিছ’ ৰাবাডাই এটাৰ পিছত আন এটা সফলতা অৰ্জন কৰিবলৈ সক্ষম হৈছে। টেষ্ট কেৰিয়াৰত মাত্ৰ ৬৬খন টেষ্ট মেচ খেলিলেও কেইবাটাও অভিলেখ গঢ়িবলৈ সক্ষম হৈছে ৰাবাডাই। শেহতীয়াকৈ ৰাবাডাই টেষ্টত ৩০০ উইকেট সম্পূৰ্ণ কৰি ইতিহাসৰ সৃষ্টি কৰিছিল। তেওঁ টেষ্টত ৩০০ উইকেট দখল কৰা ষষ্ঠজন দক্ষিণ আফ্ৰিকান বলাৰ হিচাপে পৰিগণিত হয়।
মিৰপুৰত বাংলাদেশৰ বিৰুদ্ধে খেলা প্রথমখন টেষ্টত ৰাবাডাই এই বৃহৎ সাফল্য লাভ কৰিছিল। মিৰপুৰ টেষ্টৰ দুয়োটা ইনিংছতে তেওঁ মুঠ ৯টা উইকেট দখল কৰি আইচিচিৰ ৰেংকিঙত অভাৱনীয় উত্থান লাভ কৰিছিল।
দৰাচলতে ৩০ অক্টোবৰত প্ৰকাশিত আইচিচিৰ শেহতীয়া ৰেংকিঙত কাগিছ’ ৰাবাডা ১ নম্বৰ টেষ্ট বলাৰ হিচাপে পৰিগণিত হয় আৰু ভাৰতীয় বেগী বলাৰ যশপ্ৰীত বুমৰাহৰ ৰাজত্বৰ অন্ত পেলায়।
একে সময়তে বুমৰাহ দুটা স্থান অৱনমিত হৈ তৃতীয় স্থানত উপনীত হয়। দ্বিতীয় স্থানত আছে অষ্ট্ৰেলিয়াৰ জোছ হেজলউড।
টেষ্টত সৰ্বাধিক উইকেট দখল কৰা দক্ষিণ আফ্ৰিকাৰ বলাৰ
ডেল ষ্টেইন- ৪৩৯
শ্বন পোলক- ৪২১
মাখায়া এনতিনি- ৩৯০
এলান ডোনাল্ড- ৩৩০
কাগিছো ৰাবাডা- ৩১০
টেষ্ট ৰেংকিঙৰ শীৰ্ষ স্থান দখল কৰাৰ কিছু সময়ৰ পাছতে ৰাবাডাই আন এজন ভাৰতীয় বলাৰক ডাঙৰ আঘাত দিয়ে। বাংলাদেশৰ বিৰুদ্ধে দ্বিতীয়খন টেষ্টৰ দ্বিতীয় দিনা ৰাবাডাই ২টা উইকেট দখল কৰি ডাঙৰ অভিলেখ সৃষ্টি কৰে।
টেষ্টত সৰ্বাধিক উইকেট দখল কৰা বলাৰৰ তালিকাত ৰাবাডাই ভাৰতৰ অভিজ্ঞ স্পিনাৰ ৰবীন্দ্ৰ জাদেজাক অতিক্ৰম কৰে। ৬৬ খন টেষ্ট মেচৰ ১১৯ ইনিংছত ৰাবাদাৰ নামত ৩১০ টা উইকেট আছে। একে সময়তে জাদেজাই ৭৬খন টেষ্ট মেচৰ ১৪৪ ইনিংছত নিজৰ নামত ৩০৯টা উইকেট দখল কৰিছে।
দ্বিতীয়খন টেষ্ট মেচৰ তৃতীয় দিনা একেলগে ৩ গৰাকী বলাৰক অতিক্ৰম কৰাৰ সুযোগ লাভ কৰিব এতিয়া ৰাবাডাই। তৃতীয় দিনা যদি ২টা উইকেট দখল কৰাত সফল হয় তেন্তে টেষ্টত সৰ্বাধিক উইকেট দখল কৰাৰ ক্ষেত্ৰত ব্ৰেট লী (৩১০), জাহিৰ খান (৩১১) আৰু ঈশান্ত শৰ্মা (৩১১)ক অতিক্ৰম কৰিবলৈ সক্ষম হ’ব।
