জম্মু-কাশ্মীৰৰ অনন্তনাগ জিলাৰ পাহাৰীয়া ষ্টেচন পহলগামত পৰ্যটকৰ ওপৰত আক্ৰমণ কৰে সন্ত্ৰাসবাদীয়ে। তেওঁলোকক ধৰ্মৰ বিষয়ে সুধি গুলীবিদ্ধ কৰে। লগতে তেওঁলোকক কলিমা আবৃত্তি কৰিবলৈ কোৱা হৈছিল।
সন্ত্ৰাসবাদীৰ গুলীয়ে ২৮জন নিৰীহ লোকৰ প্ৰাণ কাঢ়ি নিয়ে। পৃথিৱীৰ স্বৰ্গ বুলি কোৱা কাশ্মীৰত সন্ত্ৰাসবাদীয়ে এক মুহূৰ্ততে নৰক সদৃশ পৰিস্থিতিৰ সৃষ্টি কৰে। এই আক্ৰমণৰ প্ৰতিবাদত সমগ্ৰ দেশ একত্ৰিত হৈছে। এই আক্ৰমণৰ পিছতে শোক আৰু ক্ষোভত ভাঙি পৰিছে কাশ্মীৰীসকল।
সন্ত্ৰাসবাদী আক্ৰমণৰ বাবে ক্ষুব্ধ হৈ পৰিছে প্ৰতিজন কাশ্মীৰী। তেওঁলোকে এই আক্ৰমণক কঠোৰ ভাষাৰে গৰিহণা দিয়ে। সন্ত্ৰাসবাদীয়ে এটা বিশেষ ধৰ্মৰ লোকক লক্ষ্য কৰি এই গুলীচালনা হৈছে। এই আক্ৰমণত স্তম্ভিত হৈ পৰিছে কাশ্মীৰৰ স্থানীয় জনসাধাৰণ। সন্ত্ৰাসবাদী আক্ৰমণৰ প্ৰতিবাদত কাশ্মীৰৰ মছজিদৰ পৰা বন্ধ ঘোষণা কৰা হৈছে।এই আক্ৰমণৰ প্ৰতিবাদত ৰাজপথলৈ ওলাই আহিছে কাশ্মীৰী জনসাধাৰণ।
অনন্তনাগ জিলাৰ পহলগামৰ পৰা সমগ্ৰ কাশ্মীৰ অঞ্চললৈকে স্থানীয় ৰাইজে সন্ত্রাসবাদী আক্রমণৰ বলি হোৱা লোকসকলৰ ন্যায় বিচাৰি মমবাতিৰ সমদল উলিয়াইছে৷ মছজিদৰ ইমামসকলে লাউডস্পীকাৰৰ জৰিয়তে ঘোষণা কৰিছে যে, সন্ত্ৰাসবাদীবোৰ ইছলাম আৰু কাশ্মীৰিয়তৰ শত্ৰু। মঙলবাৰে সংঘটিত এই আক্ৰমণৰ পিছতে কাশ্মীৰৰ প্ৰায়বোৰ মছজিদৰ পৰা বুধবাৰে কাশ্মীৰ বন্ধ পালনৰ আহ্বান জনোৱা হয় যাতে এই আক্ৰমণত নিহতসকলৰ পৰিয়ালৰ সৈতে সংহতি প্ৰকাশ কৰে।
মঙলবাৰে নিশা অনন্তনাগ, পহলগাম, কুপৱাৰা, বাৰামুল্লা, বান্দিপোৰা, পুলৱামা, বুডগাম, শ্বোপিয়ান, শ্ৰীনগৰত মমবাতিৰ সমদল উলিওৱা হয়। ইফালে পহলগামৰ স্থানীয় ৰাইজে সন্ত্রাসবাদী আক্রমণৰ বলি হোৱা লোকসকলৰ ন্যায় বিচাৰি মমবাতিৰ সমদল উলিয়ায়৷ ইয়াৰ ৰাইজে কয় যে, পহলগামত যি সন্ত্ৰাসবাদী আক্ৰমণ সংঘটিত হৈছে। সেয়া সমগ্ৰ পহলগামৰ হৈ আমি এই কাপুৰুষালিক তীব্ৰ গৰিহণা দিয়ে। তেওঁ লগতে কয় যে, প্ৰথমতে তেওঁলোক ভাৰতৰ বাসিন্দা, তাৰ পিছতহে তেওঁলোক কাশ্মীৰী।
