ভয়াবহ কেৰালাৰ ভূমিস্খলনৰ ঘটনাত মৃতকৰ সংখ্যা ১২৬ গৰাকীলৈ বৃদ্ধি পাইছে। আনহাতে, ১২৮ জন লোক আহত হোৱাৰ খবৰ পোৱা গৈছে ঘটনাত।
কেৰালাৰ স্বাস্থ্যমন্ত্ৰী বীনা জৰ্জৰ মতে ১১৬ টা মৃতদেহৰ মৰণোত্তৰ পৰীক্ষা কৰা হৈছে। এনডিআৰএফকে ধৰি বহুতো বিভাগে উদ্ধাৰ অভিযান চলাই আছে। সেনাই এতিয়ালৈকে প্ৰায় ১০০০ জন লোকৰ জীৱন ৰক্ষা কৰিছে।
ইফালে, এইটোও দাবী কৰা হৈছে যে শ শ লোক এতিয়াও ধ্বংসাৱশেষৰ তলত আছে । মৃতকৰ সংখ্যা বৃদ্ধি হোৱাৰ সম্ভাৱনা ব্যক্ত কৰিছে উদ্ধাৰকাৰী দলে। ঘটনাত নৌ-সেনা আৰু বায়ু সেনা উদ্ধাৰ অভিযানত নিয়োজিত হৈ আছে।
এই ঘটনাৰ পিছতে লোকসভাৰ বিৰোধী দলৰ নেতা আৰু ৱায়ানাডৰ প্ৰাক্তন সাংসদ ৰাহুল গান্ধীয়ে ৱায়ানাডলৈ যোৱাৰ সম্ভাৱনা আছে । ইয়াৰ পূৰ্বে তেওঁ মুখ্যমন্ত্ৰী পিনাৰাই বিজয়নৰ সৈতে ফোনত বাৰ্তালাপ কৰি পৰিস্থিতিৰ বুজ লৈছিল।
আনহাতে, অন্ধকাৰৰ বাবে উদ্ধাৰ কাৰ্য বন্ধ কৰিবলৈ পৰামৰ্শ দিয়া হৈছে। অঞ্চলটোৰ এটা সুৰক্ষিত স্থানলৈ ১০০০ তকৈও অধিক লোকক স্থানান্তৰ কৰা হৈছে। উদ্ধাৰ অভিযানৰ বাবে স্নিফাৰ কুকুৰ নিয়োগ কৰা হৈছে।
ইফালে, ভূমিস্খলনত মৃত্যু হোৱা লোকৰ বাবে কেৰালা চৰকাৰে দুদিনীয়াকৈ ৰাজ্যিক শোক পালন কৰিছে।
