২০২৫ বৰ্ষৰ আই পি এল ছিজনত সাধাৰণ প্ৰদৰ্শন আগবঢ়োৱা কে কে আৰ অৰ্থাত কলকাতা নাইট ৰাইডাৰ্ছৰ মুখ্য প্ৰশিক্ষক চন্দ্ৰকান্ত পণ্ডিতক পদৰ পৰা অপসাৰণ কৰিছে। ফ্ৰঞ্চাইজিটোৱে ছ’চিয়েল মিডিয়াৰ জৰিয়তে এই কথা ৰাজহুৱা কৰে।
উল্লেখ্য যে বিগত তিনিটা ছিজনত কলকাতা নাইট ৰাইডাৰ্ছৰ মুখ্য প্ৰশিক্ষকৰ ভূমিকা পালন কৰি আহিছিল চন্দ্ৰকান্ত পণ্ডিতে। তেওঁৰ প্ৰশিক্ষণতে দলটোৱে ২০২৪ চনত আই পি এলৰ খিতাপ দখল কৰিছিল কে কে আৰে।
চলিত বছৰ অৰ্থাৎ ২০২৫ চনত কে কে আৰে অজিংক্য ৰাহানেক অধিনায়ক হিচাপে দায়িত্ব প্ৰদান কৰিছিল যদিও দলটোৱে অষ্টম স্থানেৰে ছিজনটো সমাপ্ত কৰিছিল। দলটোৱে ১৪খন খেলৰ ভিতৰত মাত্ৰ ৫খন খেলত জয়লাভ কৰাৰ বিপৰীতে ৭খন খেলত পৰাস্ত হৈছিল। দলটোৱে লাভ কৰিছিল মাত্ৰ ১২ পইণ্ট।
দলৰ প্ৰদৰ্শনৰ ভিত্তিত চন্দ্ৰকান্ত পণ্ডিতক অপসাৰণ কৰা হৈছে নে আন কিবা কাৰণ আছে সেয়া এতিয়া লক্ষ্যণীয় হ’ব। লগতে দলটোৱে কাক নতুন মুখ্য প্ৰশিক্ষক হিচাপে নিযুক্তি দিয়ে সেয়াও সময়লৈ অপেক্ষা কৰিব লাগিব।
