জম্মু-কাশ্মীৰত ডাৱৰ বিস্ফোৰণৰ লগতে ধাৰাবাহিকভাৱে হৈ থকা নেৰানেপেৰা বৰষুণৰ ফলত ভয়াৱহ ৰূপত বৃদ্ধি পাইছে ভূমিস্খলনৰ ঘটনা। শেহতীয়াকৈ লাভ কৰা তথ্য অনুসৰি, আজি বিয়লি বৈষ্ণো দেৱী যাত্ৰা পথত সংঘটিত হৈছে ভয়ংকৰ ভূমিস্খলন।
এই ঘটনাত ৫ গৰাকী ভক্তৰ মৃত্যু হোৱাৰ লগতে ১৪ গৰাকীৰো অধিক যাত্ৰী গুৰুতৰভাৱে আহত হৈছে। ভূমিস্খলন তথা বেয়া বতৰৰ প্ৰতি লক্ষ্য ৰাখি ইতিমধ্যে বৈষ্ণো দেৱী যাত্ৰা বন্ধ কৰি দিয়া হৈছে।
জম্মু-কাশ্মীৰত অবিৰত বৰষুণৰ বাবে মঙলবাৰে বিয়লি ত্ৰিকুটা পাহাৰত অৱস্থিত মাতা বৈষ্ণো দেৱী মন্দিৰলৈ যোৱাৰ পথত ভূমিস্খলনৰ ঘটনা সংঘটিত হয়। এই দুৰ্ঘটনাত বহু লোক আহত হয়। বিষয়াসকলে জনোৱা মতে, এই ঘটনাৰ পিছত বিখ্যাত মন্দিৰটোৰ তীৰ্থযাত্ৰা বন্ধ কৰি দিয়া হৈছে।
অৰ্ধকুঁৱাৰীত অৱস্থিত ইন্দ্ৰপ্ৰস্থ ভোজনালয়ৰ সমীপত দিনৰ প্ৰায় ৩ বজাত ভূমিস্খলনৰ ঘটনাটো সংঘটিত হয়। বিষয়াসকলে জনোৱা মতে, পাহাৰৰ ওপৰত অৱস্থিত মন্দিৰলৈ যোৱা ১২ কিলোমিটাৰ দৈৰ্ঘ্যৰ পথটোৰ প্ৰায় আধা বাটত এই ঘটনা সংঘটিত হৈছে।
