ৰবিচন্দ্ৰন অশ্বিনৰ পিছত আন এগৰাকী ভাৰতীয় স্পিনাৰ অমিত মিশ্ৰাই ক্ৰিকেটৰ সকলো ফৰ্মেটৰ পৰা অৱসৰ লোৱাৰ কথা ঘোষণা কৰিছে। এতিয়াৰে পৰা তেওঁক ঘৰুৱা ক্ৰিকেটৰ লগতে আই পি এলতো দেখা পোৱা নাযাব।
অৱসৰৰ কথা ঘোষণা কৰি অমিত মিশ্ৰাই কয় যে বাৰম্বাৰ আঘাত আৰু নতুন প্ৰজন্মক সুযোগ দিয়াৰ বাবে এই সিদ্ধান্ত গ্ৰহণ কৰিছো।
উল্লেখ্য যে, ২০০৩ চনত অনুষ্ঠিত হোৱা এটা ত্ৰিদেশীয় শৃংখলাত অমিত মিশ্ৰাৰ এদিনীয়া ক্ৰিকেটত অভিষেক ঘটিছিল। কিন্তু টেষ্ট ক্ৰিকেটত অভিষেক ঘটোৱাৰ বাবে তেওঁ ২০০৮ চনলৈ অপেক্ষা কৰিবলগীয়া হয়। আন্তঃৰাষ্ট্ৰীয় টেষ্ট ক্ৰিকেটৰ প্ৰথমখন মেচত তেওঁ অষ্ট্ৰেলিয়াৰ বিৰুদ্ধে খেলি পাঁচটা উইকেট দখল কৰিছিল।
আনহাতে ২০১৪ চনত বাংলাদেশত অনুষ্ঠিত হোৱা টি-২০ বিশ্বকাপত তেওঁৰ প্ৰদৰ্শন আছিল উল্লেখনীয়। সেইবাৰৰ বিশ্বকাপত মিশ্ৰাই মাত্ৰ ৬.৬৮ ইকনমিৰে ১০টা উইকেট দখল কৰি ভাৰতক ফাইনেলত উপনীত কৰোৱাত গুৰুত্বপূৰ্ণ ভূমিকা পালন কৰিছিল।
কেৰিয়াৰৰ উত্থান-পতনৰ মাজেৰে আগবঢ়া মিশ্ৰাই শেষবাৰৰ বাবে ২০১৭ চনত ভাৰতৰ হৈ আন্তঃৰাষ্ট্ৰীয় মেচত অংশ লৈছিল।
আন্তঃৰাষ্ট্ৰীয় কেৰিয়াৰৰ সমান্তৰালকৈ আই পি এলতো তেওঁৰ প্ৰদৰ্শন আছিল উল্লেখনীয়। ১৬২ খন মেচত তেওঁ ১৭৪টা উইকেট দখল কৰিছে। আই পি এলৰ ইতিহাসত সৰ্বাধিক উইকেট দখলকাৰীৰ তালিকাত তেওঁ সপ্তম স্থানত আছে।
থোৰতে তেওঁৰ কেৰিয়াৰ
টেষ্ট- ২২খন মেচত ৭৬টা উইকেট
এদিনীয়া- ৩৬খন মেচত ৬৪টা উইকেট
টি-২০- ১০খন মেচত ১৬টা উইকেট
আই পি এল- ১৬২খন মেচত ১৭৪টা উইকেট
