সমাগত শাৰদীয় দুৰ্গোৎসৱ। দেশজুৰি দুৰ্গোৎসৱ উদযাপনৰ বাবে চলিছে তীব্ৰ প্ৰস্তুতি। লগতে ব্যস্ততা বাঢ়িছে মৃণ্ময় শিল্পীসকলৰো। ইয়াৰ সমান্তৰালকৈ ব্যস্ততা বাঢ়িছে পূজা মণ্ডপ তৈয়াৰ কৰা শিল্পীসকলৰ।
এইবাৰ ২১ ছেপ্তেম্বৰৰ পৰা আৰম্ভ হ’ব মহালয়া। মহালয়াত মা দুৰ্গা ধৰালৈ নামি আহে বুলি কোৱা হয়। আৰু দশমী তিথি পৰ্যন্ত ধৰাতে থাকে মা দুৰ্গা। প্ৰতি বছৰে দুৰ্গা দেৱীৰ আগমণ আৰু গমন বেলেগ বেলেগে হয়। সাধাৰণতে চাৰি প্ৰকাৰৰ বাহনেৰে দেৱী দুৰ্গাৰ আগমন আৰু গমন কৰে। সেয়া হৈছে হাতী, ঘোঁৰা, নাও আৰু দোলা। কোৱা হয় যে, দেৱী দুৰ্গাৰ আগমন আৰু গমন প্ৰকৃতিৰ ওপৰত নিৰ্ভৰ কৰে। দেৱী দুৰ্গা কিহত আহিব আৰু যাব সেয়া প্ৰকৃতিৰ পৰিৱৰ্তনে আগজাননী দিয়ে।
বিশ্বাস অনুসৰি, দেৱী দুৰ্গাৰ আগমন আৰু প্ৰস্থান সময়ৰ ওপৰত নিৰ্ভৰ কৰে। বিশ্বাস অনুসৰি, দোলাত দেৱী দুৰ্গাৰ আগমন বা গমন হ’লে ধৰাত মহামাৰী আশংকা বৃদ্ধি পাই বুলি কোৱা হয়। দেৱীৰ দোলাত আগমন বা প্ৰস্থান মহামাৰী, ভূমিকম্প বা অতিমৃত্যুৰ সূচক। একেদৰে নাও হৈছে পানীৰ সৈতে জড়িত। কোৱা হয় যে, যদি দেৱী দুৰ্গাৰ নাৱেৰে আগমন বা প্ৰস্তান হয়, তেন্তে তেন্তে ই পানীৰ সৈতে জড়িত ঘটনাৰ সূচক, যেনে বান, যাৰ ফলত শস্য পথাৰত পলি পৰি শস্যৰ উৎপাদন বাঢ়িব পাৰে।
ইফালে, ঘোঁৰাত যদি আগমন হয় বা প্ৰস্থান কৰে, তেন্তে ধ্বংস, বিভাজন বা ধ্বংসাত্মক কাৰ্যৰ আশংকা বৃদ্ধি পায় বুলি কোৱা হয়। লগতে ই সামাজিক ও ৰাজনৈতিক অস্থিৰতা, যুদ্ধ বা বিপ্লৱৰ ইঙ্গিত দিয়ে। একেদৰে হাতীত দেৱী দুৰ্গাৰ আগমন বা প্ৰস্থান হ’লে শুভ বুলি গণ্য কৰা হয়। ইয়াৰ ফলত বসুন্ধৰা শস্যৰে ভৰপূৰ হোৱাৰ লগতে ধন-সম্পত্তিও বৃদ্ধি হয় বুলি কোৱা হয়।
সেই অনুসৰি, এইবাৰ দেৱী দুৰ্গাৰ হাতীত আগমন হ’ব। ইয়াৰ ফলত পথাৰত ভাল ফচল তথা শস্য উৎপাদন বৃদ্ধি পোৱাৰ সম্ভাৱনা আছে। কিন্তু এইবাৰ মা দুৰ্গা দোলাত যাত্ৰা কৰিব। ফলত মহামাৰী তথা বিভিন্ন জটিল ৰোগৰ আশংকা বৃদ্ধি হ’ব পাৰে। চলিত বছৰত আগমন শুভ হ’ব পাৰে যদিও প্ৰস্থান শুভ নহ’বও পাৰে।
