মধ্যপ্ৰদেশৰ মাণ্ডছৌৰ জিলাৰ মুলতানপুৰা গাঁৱত একাংশ ৰোগীৰ গুইলেইন-বাৰে চিণ্ড্ৰমৰ সংক্ৰমণ নিশ্চিত হৈছে। ইয়াৰ পিছতেই মঙলবাৰে কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয় আৰু বিশ্ব স্বাস্থ্য সংস্থাৰ এটা দলে এই ঠাইলৈ আহি পৰিস্থিতিৰ বুজ লয়।
মাণ্ডছৌৰৰ জিলা দণ্ডাধীশে জনোৱা মতে, বৰ্তমান মুঠ জিবিএছ ৰোগীৰ সংখ্যা ৬ জন, ইয়াৰে দুজন বাহিৰত চিকিৎসাধীন হৈ আছে। তেওঁ কয় যে, কেইসপ্তাহমানৰ আগতে জিলাখনত গুইলেইন-বাৰে চিণ্ড্ৰমৰ ৰোগী ধৰা পৰিছিল, তাৰ পিছত জিলা পৰ্যায়ৰ দলটোৱে ঘৰে ঘৰে জৰীপ চলাইছিল।
জিলা দণ্ডাধীশে জনোৱা মতে, এই সন্দৰ্ভত কেন্দ্ৰীয় দল আহিছিল, যাৰ নেতৃত্বত আছিল নেশ্যনেল চেণ্টাৰ ফৰ ডিজিজ কণ্ট্ৰ’লৰ বিশেষজ্ঞৰ দলটোৱে পৰিস্থিতিৰ বুজ লৈ গুইলেইন-বাৰে চিণ্ড্ৰম (জিবিএছ)ৰ গোচৰসমূহৰ সবিশেষ তথ্য লাভ কৰে। তেওঁ কয় যে, ভুক্তভোগীসকল কেনেদৰে জিবিএছত আক্ৰান্ত হৈছিল আৰু বৰ্তমান এনে কিমানজন লোক ইয়াৰ দ্বাৰা আক্ৰান্ত হৈছে সেই কথা জানিবলৈ দলটোৱে চেষ্টা চলাইছে।
জিবিএছ হৈছে এক বিৰল স্নায়ুজনিত অৱস্থা য’ত ৰোগ প্ৰতিৰোধ ক্ষমতাই স্নায়ুবোৰক আক্ৰমণ কৰে, যাৰ ফলত পেশী দুৰ্বল হৈ পৰে আৰু কেতিয়াবা পক্ষাঘাত হয়। জিবিএছৰ লক্ষণসমূহ আগতীয়াকৈ চিনাক্ত কৰা আৰু সময়মতে চিকিৎসা কৰাটো আৰোগ্য লাভৰ বাবে অতি গুৰুত্বপূৰ্ণ।
