প্ৰধানমন্ত্ৰী নৰেন্দ্ৰ মোদীয়ে আজি দিনৰ ১১বজাত মাহেকীয়া ৰেডিঅ’ অনুষ্ঠান ‘মন কি বাত’ৰ জৰিয়তে দেশবাসীক সম্বোধন কৰে। এইটো ‘মন কি বাত’ অনুষ্ঠানৰ ১১৩ তম খণ্ড। প্ৰধানমন্ত্ৰী মোদীয়ে প্ৰতি মাহৰ শেষ দেওবাৰে ‘মন কি বাত’ অনুষ্ঠিত কৰে আৰু দেশৰ জনসাধাৰণৰ সৈতে বাৰ্তালাপ কৰে।
আজিৰ এই অনুষ্ঠানত প্ৰধানমন্ত্ৰীয়ে কয় যে, বৰ্তমান উন্নত ভাৰতৰ ভেটি শক্তিশালী হৈ উঠিছে। বিগত বৰ্ষত সমগ্ৰ দেশৱাসীয়ে চন্দ্ৰযান-৩ৰ সফলতা উদযাপন কৰিছে।
২৩ আগষ্ট শুকুৰবাৰে, দেশত প্ৰথম ৰাষ্ট্ৰীয় মহাকাশ দিৱস অনুষ্ঠিত কৰা হৈছিল। মহাকাশ খণ্ডৰ সংস্কাৰৰ দ্বাৰা যুৱচাম লাভান্বিত হৈছে বুলি উল্লেখ কৰে প্ৰধানমন্ত্ৰীয়ে।
প্ৰধানমন্ত্ৰী মোদীয়ে কয় যে, ‘হৰ ঘৰ তিৰংগা’ আৰু ‘পুৰা দেশ তিৰংগা’ এই অভিযান এইবাৰ সম্পূৰ্ণ শিখৰত আছিল। এই অভিযানৰ সৈতে সম্পৰ্কিত আশ্চৰ্যজনক ছবিবোৰ দেশৰ প্ৰতিটো কোণৰ পৰা ওলাই আহিছে।এই অভিযানে সমগ্ৰ দেশক এক কৰি ৰাখিছে আৰু এইটোৱেই হৈছে ‘এক ভাৰত – শ্ৰেষ্ঠ ভাৰত’।
প্ৰধানমন্ত্ৰী মোদীয়ে কয় যে, স্বাধীনতা সংগ্ৰামৰ সময়তো সমাজৰ প্ৰতিটো ক্ষেত্ৰৰ পৰা যথেষ্ট সংখ্যক লোক আগবাঢ়ি আহিছিল, যাৰ কোনো ৰাজনৈতিক পৃষ্ঠভূমি নাছিল। চলিত বৰ্ষত তেওঁ ৰাজনৈতিক পৃষ্ঠভূমি নোহোৱা এক লাখ যুৱক-যুৱতীক লালকিল্লাৰ পৰা ৰাজনৈতিক ব্যৱস্থাত যোগদান কৰিবলৈ আহ্বান জনায়।
এই কাৰ্যসূচীত প্ৰধানমন্ত্ৰীয়ে কয় যে, একবিংশ শতিকাত ভাৰতত এনে বহুতো ঘটনা ঘটিছে যিয়ে উন্নত ভাৰতৰ ভেটি শক্তিশালী কৰি আছে। ২৩ আগষ্টত দেশে প্ৰথম ৰাষ্ট্ৰীয় মহাকাশ দিৱস উদযাপন কৰিছে। বিগত বৰ্ষত এই দিনটোতে চন্দ্ৰযান-৩ সফলতাৰে চন্দ্ৰৰ দক্ষিণ অংশৰ শিৱ-শক্তি বিন্দুত অৱতৰণ কৰিছিল। এই গৌৰৱান্বিত সাফল্য অৰ্জন কৰা ভাৰত বিশ্বৰ প্ৰথম খন দেশ হৈ পৰিছে।
