মথুৰাস্থিত শ্ৰী কৃষ্ণ জন্মভূমি-শ্বাহী ঈদগাহ গোচৰত এলাহাবাদ উচ্চ ন্যায়ালয়ে ডাঙৰ মন্তব্য কৰিছে। মথুৰাৰ শ্বাহী ঈদগাহ মছজিদক ‘বিতৰ্কিত সৌধ’ হিচাপে গণ্য নকৰাৰ সিদ্ধান্ত এলাহাবাদ উচ্চ ন্যায়লয়ৰ। আপাততঃ ইয়াক মছজিদ হিচাপেই গণ্য কৰা হ’ব বুলি হিন্দু পক্ষক স্পষ্টভাৱে জনাই দিলে ন্যায়ালয়ে।
এই সন্দৰ্ভত হিন্দু পক্ষই দাখিল কৰা আবেদন খাৰিজ কৰি এই গুৰুত্বপূৰ্ণ ঘোষণা ন্যায়ালয়ৰ।
উল্লেখ্য যে, মথুৰাৰ শ্বাহী ঈদগাহ মছজিদক কেন্দ্ৰ কৰি চলা বিতৰ্ক দীৰ্ঘদিনীয়া। ইয়াক লৈ একাধিক গোচৰ বিচৰাধীন হৈ আছে এলাহাবাদ হাইক’ৰ্টত।
শেহতীয়াকৈ হিন্দু পক্ষই বিবদমান এই মছজিদটোক ‘বিতৰ্কিত সৌধ’ হিচাপে গণ্য কৰাৰ দাবীৰে এলাহাবাদ হাইক’ৰ্টৰ দ্বাৰস্থ হৈছিল। ইয়াৰ বিপৰীত স্থিতিৰে উচ্চ ন্যায়ালয়ত আবেদন কৰিছিল মুছলিম পক্ষই।
গোচৰটো সন্দৰ্ভত এলাহাবাদ উচ্চ ন্যায়ালয়ৰ ন্যায়াধীশ ৰাম মনোহৰ মিশ্ৰৰ বিচাৰপীঠে হিন্দু পক্ষৰ আবেদন খাৰিজ কৰে। ইয়াৰ বিপৰীতে মুছলমান পক্ষৰ আপত্তিক গুৰুত্বসহকাৰে লৈ মছজিদটোক ‘বিতৰ্কিত সৌধ’ হিচাপে গণ্য কৰা নহ’ব বুলি জনাই দিয়ে।
উল্লেখ্য যে, হিন্দুৰ জ্ঞান-বিশ্বাসমতে মথুৰা হ’ল প্ৰভু শ্ৰীকৃষ্ণৰ জন্মভূমি। ইয়াৰ উপৰি সেই চহৰত আছে অনেক প্ৰাচীন হিন্দু মন্দিৰ। প্ৰাচীন কেশৱনাথ মন্দিৰ ভাঙি ঔৰংগজেবে শ্বাহী ঈদগাহ মছজিদ নিৰ্মাণ কৰিছিল বুলি বহু ইতিহাসবিদৰ দাবী। এই লৈ দুইপক্ষৰ মাজত অব্যাহত আছে দীৰ্ঘদিনীয়া সংঘাত। এই অৱস্থাত এলাহাবাদ হাইক’ৰ্টৰ শেহতীয়া এই ৰায় তাৎপৰ্যপূৰ্ণ হিচাপে বিবেচিত হৈছে।
