শেহতীয়াকৈ ৰাজ্যৰ বিভিন্ন প্ৰান্তত চলি থকা উচ্ছেদ অভিযানৰ জৰিয়তে অসম চৰকাৰে অবৈধ দখলকাৰীৰ পৰা প্ৰায় ১৮২ বৰ্গ কিলোমিটাৰ ভূমি পুনৰ উদ্ধাৰ কৰিবলৈ সক্ষম হৈছে। আজি মুখ্যমন্ত্ৰী ড০ হিমন্ত বিশ্ব শৰ্মাই এই কথা জানিবলৈ দিয়ে।
ইফালে উচ্ছেদিত লোকসকলৰ মাজৰ একাংশই চৰকাৰৰ উচ্ছেদ অভিযানক সমালোচনা কৰি অসমক একপ্ৰকাৰ দ্বিখণ্ডিত কৰাৰ ভাবুকি প্ৰদান কৰি মিঞালেণ্ডৰ দাবীও উত্থাপন কৰা পৰিলক্ষিত হৈছে।
মিঞালেণ্ডৰ দাবী সন্দৰ্ভত প্ৰতিক্ৰিয়া প্ৰকাশ কৰি মুখ্যমন্ত্ৰী শৰ্মাই আজি এক সংবাদমেলৰ জৰিয়তে কয়, ‘অসম চৰকাৰে বেদখলকাৰীৰ পৰা ১৮২ বৰ্গ কিলোমিটাৰ ভূমি পুনৰ উদ্ধাৰ কৰিছে। এতিয়া এই একে অনুপ্ৰৱেশকাৰীয়ে পৃথক ‘মিঞা লেণ্ড’ ৰাজ্যৰ দাবী জনাইছে। তেওঁলোকৰ সপোন নিশ্চয় বাস্তৱায়িত হ’ব – কিন্তু ভাৰতত নহয়, বাংলাদেশ বা আফগানিস্তানত। আৰু মই তেওঁলোকক তাত যোৱাত নিশ্চয় সহায় কৰিম।’
আনহাতে শেহতীয়াকৈ গুৱাহাটীৰ ভিন্ন প্ৰান্তত সন্দেহজনক লোকে অবৈধভাৱে ভূমি দখল কৰাৰ তথ্য পোহৰলৈ অহা সন্দৰ্ভত মুখ্যমন্ত্ৰী শৰ্মাই কয় যে অবৈধভাৱে বসবাস কৰি লোকসকলৰ তথ্য সংগ্ৰহৰ বাবে এটা জৰীপ চলোৱা হ’ব আৰু ইয়াৰ পিছতে তেওঁলোকক সেই স্থানৰ পৰা আঁতৰোৱা হ’ব।
মুখ্যমন্ত্ৰী শৰ্মাই লগতে গুৱাহাটীত চলিবলগীয়া উচ্ছেদত অসমৰ খিলঞ্জীয়া লোকৰ ওপৰত কোনো ধৰণৰ প্ৰভাৱ নপৰে বুলিও উল্লেখ কৰে।
মনকৰিবলগীয়া যে, অসমক দুভাগ কৰি ‘মিঞা লেণ্ড’ গঠনৰ দাবী উত্থাপিত হৈছিল উজনি অসমত। ৰাজ্যজুৰি উচ্ছেদ অভিযান অব্যাহত থকাৰ মাজতেই ৰেংমা বনাঞ্চলৰ একাংশ উচ্ছেদিতই দাবী কৰিছিল ‘মিঞা লেণ্ড’ৰ।
উল্লেখ্য যে, শেহতীয়াকৈ চৰকাৰী ভূমি দখলমুক্ত কৰিবলৈ বিলাসীপাৰা, গোৱালপাৰাৰ লগতে উজনি অসমৰ উৰিয়ামঘাটত চৰকাৰে বৃহত উচ্ছেদ অভিযান চলাইছে।
