অহা বছৰ পাকিস্তানত অনুষ্ঠিত হ’বলগীয়া চেম্পিয়নছ ট্ৰফীৰ পাছত এদিনীয়া ফৰ্মেটৰ পৰা অৱসৰ লোৱাৰ কথা ঘোষণা কৰিছে আফগানিস্তানৰ অল ৰাউণ্ডাৰ মহম্মদ নবীয়ে। বাংলাদেশৰ বিৰুদ্ধে ২-১ ব্যৱধানত এদিনীয়া শৃংখলা দখলৰ পিছতে আফগানিস্তানৰ ৩৯ বছৰীয়া নবীয়ে কয় যে যোৱা বছৰ এদিনীয়া বিশ্বকাপৰ পাছতেই এদিনীয়া ক্ৰিকেটৰ পৰা অৱসৰ লোৱাৰ কথা চিন্তা কৰিছিলো।
শৃংখলা দখলৰ পিছত মহম্মদ নবীয়ে কয়, ‘যোৱা বিশ্বকাপৰ পিছতেই অৱসৰৰ চিন্তা-চৰ্চা কৰিছিলো কিন্তু তাৰ পিছত আমি চেম্পিয়নছ ট্ৰফীৰ বাবে যোগ্যতা অৰ্জন কৰিলোঁ আৰু মই ভাবিলো যে এই প্ৰতিযোগিতাখন খেলাটো মোৰ বাবে ভাল হ’ব।
উল্লেখ্য যে মহম্মদ নবীয়ে নিজৰ সিদ্ধান্তৰ বিষয়ে আফগানিস্তান ক্ৰিকেট ব’ৰ্ডক অৱগত কৰিছে আৰু আগন্তুক দিনতো তেওঁ টি-২০ ফৰ্মেট খেলি থাকিব পাৰিব।
২০০৯ চনৰ পৰা এই পৰ্যন্ত মহম্মদ নবীয়ে ১৬৭খন এদিনীয়া খেলিছে, য’ত তেওঁ ১৪৭টা ইনিংছত ২৭.৪৮ গড়ে ৩৬০০ ৰান সংগ্ৰহ কৰিছে, য’ত আছে দুটা শতক আৰু ১৭টা অৰ্ধশতক। আফগানিস্তানৰ হৈ সৰ্বাধিক এদিনীয়া খেলা ক্ৰিকেটাৰ মহম্মদ নবী বৰ্তমান অল ৰাউণ্ডাৰৰ ৰেংকিঙত শীৰ্ষ স্থানত আছে। তেওঁৰ সৰ্বোত্তম স্ক’ৰ হৈছে ১৩৬ ৰান।
ইফালে এইপৰ্যন্ত তেওঁ দখল কৰিছে ১৭২টা উইকেট। তেওঁ চাৰিবাৰকৈ এটা ইনিংছত ৪টা উইকেট আৰু এবাৰ ৫টা উইকেট দখল কৰিছে।
উল্লেখ্য যে, যোৱা বছৰ আফগানিস্তানে বিশ্বকাপত ষষ্ঠ স্থান দখল কৰি চেম্পিয়নছ ট্ৰফীৰ বাবে যোগ্যতা অৰ্জন কৰিছিল। অহা বছৰৰ ফেব্ৰুৱাৰী মাহত পাকিস্তানত আয়োজিত হ’বলগীয়া আঠটা দলৰ এই প্ৰতিযোগিতাত প্ৰথমবাৰৰ বাবে অংশগ্ৰহণ কৰিব আফগানিস্তানৰ দলটোৱে।
আফগানিস্তানে ২০১৫ চনত প্ৰথমবাৰৰ বাবে এদিনীয়া বিশ্বকাপত অংশগ্ৰহণ কৰিছিল আৰু মহম্মদ নবী এই দলৰ অংশ আছিল। ইয়াৰ উপৰি তেওঁ ২০১৯ আৰু ২০২৩ চনৰ বিশ্বকাপ দলৰো অংশ আছিল। ২০১৯ চনত তেওঁ টেষ্টৰ পৰা অৱসৰ গ্ৰহণ কৰে।
