নিজ জন্মভূমি নহয়, এইবাৰ ভাৰতৰ বৈৰী ৰাষ্ট্ৰ পাকিস্তানৰ সংবাদ মাধ্যম দখল কৰিছে কংগ্ৰেছী সাংসদ গৌৰৱ গগৈয়ে। পাকিস্তানৰ সংবাদ মাধ্যমসমূহ সম্প্ৰতি ভৰি পৰিছে গৌৰৱ গগৈৰ গুণানুকীৰ্তনেৰে। সাংসদ গৌৰৱ গগৈ আৰু ৰাহুল গান্ধীক প্ৰশংসাৰে উপচাই পাকিস্তানৰ সংবাদ মাধ্যমে পৰিৱেশন কৰিছে এটাৰ পিছত আন এটা বাতৰি।
ইয়াৰ কাৰণ অপাৰেশ্যন সেন্দূৰ সন্দৰ্ভত গৌৰৱ গগৈয়ে সংসদত দিয়া ভাষণ। একপ্ৰকাৰ ভাৰত বিৰোধী ভাষণ দিয়া গৌৰৱ গগৈৰ উদ্ধৃতিৰে চুবুৰীয়া ৰাষ্ট্ৰখনৰ সংবাদ মাধ্যমে ধাৰাবাহিকভাৱে বাতৰি প্ৰকাশ কৰা পৰিলক্ষিত হৈছে।
ভাৰতৰ প্ৰতিৰক্ষা বিভাগৰ সক্ষমতাক লৈ গৌৰৱ গগৈয়ে প্ৰশ্ন উত্থাপন কৰি অপাৰেশ্যন সেন্দূৰৰ সময়ত ভাৰতৰ কিমানখন যুদ্ধ বিমান ধ্বংস হৈছে, পেহেলগামত সন্ত্ৰাসবাদী কেনেকৈ প্ৰৱেশ কৰিবলৈ সক্ষম হৈছিল, ড’নাল্ড ট্ৰাম্পৰ কথাত মোদীয়ে কিয় যুদ্ধ বিৰতি ঘোষণা কৰিছিল আদি বিষয়ক লৈ মোদী নেতৃত্বাধীন চৰকাৰক সমালোচনা কৰিছিল।
ভাৰতৰ নিৰাপত্তা তথা সেনা বাহিনীৰ শক্তিক লৈ সাংসদ গগৈয়ে উত্থাপন কৰা প্ৰশ্নৰ সুবিধা গ্ৰহণ কৰি তথা উৎফুল্লিত হৈ পাকিস্তানৰ সংবাদ মাধ্যমসমূহে ধাৰাবাহিকভাৱে ভাৰতৰ বিৰুদ্ধে বাতৰি প্ৰকাশ কৰিছে।
কেৱল এয়াই নহয় পাকিস্তানৰ সাধাৰণ জনতাইও সংবাদ মাধ্যমসমূহৰ আগত অসমৰ সাংসদ গৌৰৱ গগৈৰ সমৰ্থনত মন্তব্য প্ৰকাশ কৰা পৰিলক্ষিত হৈছে। সাংসদগৰাকীৰ এনে কাৰ্যই স্বাভাৱিকতে ভাৰতৰ প্ৰতিৰক্ষাৰ প্ৰতি ভাবুকিৰ সৃষ্টি কৰা বুলি বিভিন্নজনে মত প্ৰকাশ কৰিছে।
উল্লেখ্য যে সংসদৰ মজিয়াত গৌৰৱ গগৈয়ে দিয়া ভাষণৰ পিছতে এটা ৰাতিৰ ভিতৰতে পাকিস্তানী টিভি চেনেলসমূহৰ নয়নৰ মণি হৈ পৰে কংগ্ৰেছী সাংসদ গৌৰৱ গগৈ। গৌৰৱ গগৈৰ প্ৰশংসাত পঞ্চমুখ হৈ পৰে পাকিস্তানী মিডিয়া। পাকিস্তানৰ সপক্ষে কথা কোৱা গৌৰৱ গগৈ আৰু ৰাহুল গান্ধীৰ এই ভূমিকাত খুবেই অত্যুৎসাহী হৈ পৰে পাকিস্তানী মিডিয়া।
ইফালে সদনৰ মজিয়াত সাংসদ গৌৰৱ গগৈয়ে কৰা মন্তব্যক উভতি ধৰিছে অসমৰ মুখ্যমন্ত্ৰী হিমন্ত বিশ্ব শৰ্মা আৰু দেশৰ গৃহমন্ত্ৰী অমিত শ্বাহে। এই সন্দৰ্ভত মুখ্যমন্ত্ৰী শৰ্মাই সামাজিক মাধ্যমৰ জৰিয়তে কয়, ‘যোৰহাটৰ আমাৰ সাংসদজনে কালি সংসদত দিয়া ভাষণে সন্দেহাতীতভাৱে প্ৰমাণ কৰি দিলে যে তেওঁ পাকিস্তানৰ হৈয়ে কাম কৰে। তেওঁৰ পাকিস্তানলৈ গোপন ভ্ৰমণ আৰু পাকিস্তানী প্ৰতিষ্ঠানৰ সৈতে ঘনিষ্ঠ সম্পৰ্কই বহু কথা স্পষ্ট কৰি তুলিছে।’
